Mádenıet jáne sport mınıstri Arystanbek Muhamedıuly memlekettik aqshaǵa tek eldiń rýhyn kóteretin týyndylardy túsirý kerektigin aıtty, dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.
"Ne týraly ekeni túsiniksiz, "jany" joq fılmderdi kórsetýdi qoıý kerek. Vırtýaldy mahabbat, tarıhı mahabbat dep neshe túrli kıno túsiredi, biraq tarıh týraly eshteńe joq. Ondaı týyndylardyń bizge ne keregi bar? Memlekettik aqshaǵa tek halyqtyń namysyn oıatatyn, eldiń rýhyn kóteretin týyndylardy túsirýimiz kerek",- dedi Muhamedıuly mınıstrliktiń keńeıtilgen alqasynda.
Mınıstr jas rejıser Emır Baıǵazınniń "Ózen" fılmin maqtady. Atalǵan kınokartınany Mádenıet jáne sport mınıstrligi qarjylandyrǵan.
"Osy fılmi úshin ol Venesıan festıvalinde eń bedeldi úzdik rejıser syılyǵyn aldy. Osy arqyly ol týyndyda rýhanı, adamı qundylyqtardy dáripteý arqyly halyqaralyq syılyq alýǵa bolatynyn dáleldedi. Áıtpese, buǵan deıin kórdińizder ǵoı, qazaqtardy beıshara etip kórsete beredi", - degen Muhamedıuly rejıserlerdi maǵynasy tereń, sapaly fılmder túsirýge shaqyrdy.
Ol kıno tek kórkem qubylys emes, sonymen qatar bıznes ekenin atap ótti. Sondyqtan memleket iri sheteldik kınokompanıalardy tartý jumysyn maqsatty túrde júrgizip jatyr.
Usynǵan: Maqpal Sembaı
