Qala ákiminiń qabyldanýynda bolǵan turǵyndardyń kóbisin baspana máselesi mazalaıdy, dep jazady Qamshy.kz aqparat agenttigi elorda.info saıtynyń deregine súıenip.
Elorda basshysynyń jeke qabyldaýynda 50-ge jýyq qala turǵyny bolyp, óz máselelerin jetkizdi. Ákim qabyldaýyna jazylǵandardyń negizgi bóligi kóp balaly analar, olardyń kótergen máseleleri - baspana, jumys jáne erekshe kútimdi talap etetin balalary úshin jaǵdaı jasaý.
Baqyt Sultanov ákimdikke kelgen árbir azamatty jeke qabyldap, qandaı suraqtar mazalaıtynyn tyńdaı kele, orynbasarlary men tıisti basqarma basshylaryna tapsyrma berdi.
«Men sizderdi qabyldaýǵa jáne ár suraqtaryńyzǵa jaýap berýge árqashan ázirmin. Osynda kelgen azamattardy tolǵandyrǵan suraqtar meni de mazalaıdy. Bárin qyzyqtyratyn baspana máselesi jaıyna kelsek, qala boıynsha komýnaldyq turǵyn úı qorynda baspana kezeginde 45 myńnan astam adam tur, onyń 20 myńnan astamy - túrli áleýmettik az qamtylǵan toptarǵa jatady», - dedi B. Sultanov.
Sonymen qatar qala basshysy ákimdik tarapynan beriletin turǵyn úı sertıfıkattarynyń sanyn 2 myńǵa deıin ulǵaıtatynyn aıtyp ótti. Osy tusta aıtyp ótken jón 1 mln teńgeni quraıtyn turǵyn úı sertıfıkaty, ótken jyly 100 búdjet salasy qyzmetkerlerine tabys etildi.
«Sizderdi jeke qabyldaýym qyzmettik mindetinen bólek, aldaǵy ýaqytta ne isteý kerek, qandaı sharalar qabyldaý qajettigin saraptaý úshin de mańyzdy. Qazirgi tańda baspana máselesin sheshý joldaryn qarastyrýdamyz. Sonyń ishinde kezekte turǵan turǵyndardyń áleýmettik osal toptaryna belgili ýaqyttan keıin satyp alý quqyǵymen páterlerdi jalǵa berý múmkindigi usynylady. Bul degenimiz azamattar tapqan aqshasyn páter ıesine emes, óz menshigine ótetin páter úshin quıýǵa múmkindik alady degen sóz», - deıdi ol.
Ákimniń aıtýynsha, baspana máselesin ár otbasyna jeke taldaý jasaı otyryp, júıeli túrde sheshý qajet.
«Byltyr 180 páter paıdalanýǵa berilse, bıyl 500 eger qoldan kelse odan da asyrýǵa tyrysamyz. Taǵy bir aıtyp ketetin dúnıe, qala búdjeti túbi joq qudyq emes, onyńda shegi bar jáne jumsalýy tıis salasy bar. Kóp azamattar ákimdikte turǵyn úı qory bar jáne oǵan bólinetin bólek qarajat bar dep oılaıdy. Adam bir nársege qol jetkizý úshin eńbektený kerek. Siz jumys isteńiz, eńbektenińiz, bul baǵytta memleket tarapynan barlyq múmkindik jasalǵan. Sondyqtan da tegin úı degen túsinikten arylý qajet», - dedi qala ákimi.
Aıta ketsek, 20 aqpan kúni B.Sultanov elorda halqy aldynda jyldyq esep bergen bolatyn.
Shahar basshysy óz baıandamasyn kóp balaly jáne az qamtylǵan otbasylarǵa qatysty túsinikteme berýden bastady.
Odan bólek qala ákimi «7-20-25» turǵyn úı baǵdarlamasyn júzege asyrý maqsatynda Astanada ekinshi deńgeıli bankterge 27 mlrd teńgeni quraıtyn nesıe bólingenin aıtyp ótti.
Usynǵan: Nazerke Labıhan
