2019 jyldyń 21 aqpanynda Qazaqstan Baspasóz klýbynda “Dombyra” telearnasynyń iske qosylýyna arnalǵan baspasóz májilisi ótti.

Baspasóz májilisine QR-nyń eńbek sińirgen ártisi Seken Turysbekov, QR-nyń eńbek sińirgen ártisi Ramazan Stamǵazıev, QR-nyń eńbek sińirgen ártisi Aıgúl Úlkenbaeva, QR-nyń eńbek sińirgen qaıratkeri Muqasan Shahzadaev, Zhuldyz TV Media quryltaıshysy Smaıyl Jańylbekov, “Dombyra” jáne "Zhuldyz" telearnasynyń dırektory Qanat Erjigitov qatysty.

Qoǵamdy ulttyq mádenıet pen biregeılikti saqtaý men qaıta jańǵyrtý ıdeıasynyń tóńireginde odan ári toptastyrý maqsatynda Elbasymyzdyń sheshimimen shilde aıynyń 1-shi jeksenbisi «Ulttyq dombyra kúni» bolyp jarıalandy. Dombyra – qazaqtyń kıesi, qasıeti, qazynasy. IýNESKO-niń sheshimimen dombyra men kúı adamzattyń materıaldyq emes mádenı muralarynyń tizimine endi. Osyǵan oraı, telearnanyń dırektory qanat Erjigitov «Dombyra» telearnasy – qazaq halqynyń rýhanı jan serigine aınalǵan mýzykalyq tól aspaptaryn, dástúrli ánderi men ulttyq kúılerin halyqqa barynsha nasıhattaıtyn jańa formattaǵy telearna bolýyn kózdeıtinin jetkizdi. Onymen qosa, efırde baǵdarlamalar qazaq tilinde júrgiziletindigin, telearnanyń tek qazaqstandyq ónimdi usynyp, dástúrli aspaptarymyzdy tolyqqandy dáripteıtin Qazaqstan tarıhyndaǵy tuńǵysh telearna bolatyndyǵyn jáne otandyq estradanyń burynǵy ókilderi men qazirgi zaman ókilderiniń úzdik jumystary kórsetiletindigin aıta ketti. Telearnanyń mısıasy qarapaıym: jastar arasynda patrıottylyqty qalyptastyrý jáne mádenıetti ilgeriletý. “Dombyra” telearnasy qazirdiń ózinde Qazaqstannyń kabeldik jelileri «IDTV», ınternet jelisinde YOUTUBE kanaly, áleýmettik jeliler arqyly taratylýda.

Kúlli qazaqqa súıinshilep, «Dombyra» telearnasy ashyldy" dep jar salǵan edik. Júregi qazaq dep soqqan árbir jannyń eleń etip, qýanǵanyn aıtpa da túsinikti shyǵar. Atalmysh jańalyqty jazǵan boıda, oqyrmandar arasynda «Ony qaıdan kóre alamyz? Qalaı qosylamyz? Aqyly ma? Qashan qosylady?» degen mazmundaǵy túrli saýal kelip tústi. Muny bilmek nıetpen, táı-táı basqan telearnanyń dırektory Qanat Qudaıbergenuly Erjigitovke habarlasqan edik.

«Alla qalasa, telearnamyz dúısenbi kúni kópshilik nazaryna shymyldyǵyn ashady. Qazirshe iD TV jerseriktik derbes teledıdardyń 26-ynshy kanalynan kóre alasyzdar. Telearna 24 saǵat úzilissiz jumys isteıtin bolady. Aldaǵy ýaqytta Ulttyq jerseriktik OTAU TV teleradıohabar taratý jelisine de qosylamyz. YouTube-ta da kanalymyz ashylady. Kórermenmen tikeleı efırde júzdesemiz.

«Juldyz» telearnasyn ashqanyma shamamen, 3 jyl boldy. Bul telearnamyzda ózge telearnalar sekildi shashyn boıap, etek qıǵandardyń beınebaıandaryn kórsetpeımiz. Munda da tek qazaqı ánder shyrqalyp, beınebaıandar kórsetiledi. Sońǵy kezde kórermender tarapynan «Nege terme qoımaısyzdar? Dástúrli ánder, kúıler kóp berilse...» degen saýal-usynystar qoıyldy. Burynnan-aq oıymda júrgen isti júzege asyrýǵa kórermenderdiń «talaby» túrtki boldy. Sóıtip, «Dombyra» telearnasy da dúnıege keldi! «Dombyra» tek dástúrli án, terme, qazaq ánderine túsirilgen beınebaıandar ǵana emes, telebaǵdarlamalar da túsiremiz, kórsetemiz. Sheteldegi qazaq ánderine baıqaýlar uıymdastyramyz.

"Kóshtiń basyn aǵa býynnan bastaıyq" degen nıetpen, elimizdiń betkeustar óner adamdarynyń oryndaýyndaǵy dástúrli ánderge ulttyq kıimmen túsken baǵdarlama, beınebaıandaryn izdep edik, ókinishke oraı, tym az eken. Sondyqtan, biraz aǵa býynnyń qatysýymen arnaıy baǵdarlama daıyndadyq. Áýeli sol kórermenge jol tartady. Aldaǵy ýaqytta orta býynǵa, keıingi býynǵa da kezek keleri sózsiz. Ata-apalarymyzdyń batasyn alsaq, isimiz de ońǵa basar. Batadan asyp ketken qazaqty kórmeppin.

Aldaǵy ýaqytta ózge de óner juldyzdarynyń telearnanyń erejelerine saı túsirilgen beınebaıandary bolsa, mindetti túrde oqyrman nazaryna tegin usynatyn bolamyz.

Maqsatymyz – elimizdiń, salt-dástúrimizdiń, ónerimizdiń damýyna teńizge tamǵan tamshydaı bolsa da úlesimizdi qosý.

Sheteldegi qazaq baýyrlarymyzdyń da ánderin elimizdiń óner juldyzdaryna usynyp, aıtqyzyp, beınebaıan túsirý de oıda bar. Tipti sheteldegi baýyrlarymyzdyń túsirgen beınebaıandary telearnanyń standartyna saı kelse, qalyń kórermenge oılanbastan usynatyn bolamyz. Bári de ýaqyt enshisinde.

Bastysy – alǵa qadam attadyq! Endigi qadamdy kórermender jasasa, bul isti beker bastamaǵanymyzdyń dáleli bolar edi. Eńbek! Aıanbaı eńbek etsek, nátıjesi de kóp kúttirmesi anyq! Telearnamyz kópshiliktiń kózaıymyna aınalyp, júreginen oryn tabady dep úmittenemiz» - dep sózin sabaqtady ómirge jańa kelgen «Dombyra» telearnasynyń dırektory.