Qazaqstan Respýblıkasynyń Konstıtýsıasyna sáıkes úkimet otstavkaǵa ketkennen keıin memleket basshysy parlament májilisine jańa premer-mınıstrdiń kandıdatýrasyn usynýy tıis, dep jazady Qamshy.kz aqparat agenttigi sputniknews.kz saıtynyń deregine súıenip.

Ata Zańnyń 44-baby 3-tarmaǵynda Qazaqstan prezıdenti parlament májilisinde ókildigi bar saıası partıalar fraksıalarymen konsýltasıalardan keıin kelisim berý úshin májilistiń qaraýyna premer-mınıstrdiń kandıdatýrasyn engizetini aıtylǵan.   

Májilistiń kelisiminen keıin memleket basshysy premer-mınıstrdi qyzmetke taǵaıyndaıdy. Sodan keıin premer-mınıstrdiń usynýymen prezıdent úkimettiń qurylymyn aıqyndap, tómengi palatamen konsýltasıalardan keıin Úkimet múshelerin qyzmetke taǵaıyndaıdy.

Sonymen qatar, prezıdent syrtqy ister, qorǵanys, ishki ister mınıstrlerin qyzmetke derbes taǵaıyndaıdy;

Úkimet jasaqtalǵannan keıin, memleket basshysy mınıstrler kabınetiniń antyn qabyldaıdy.

Buǵan qosa, prezıdent erekshe mańyzdy máseleler boıynsha qajettigine qaraı úkimet otyrystaryna tóraǵalyq etedi.

Sondaı-aq, Konstıtýsıaǵa sáıkes, memleket basshysy premer men úkimettiń basqa da múshelerin qyzmetinen bosatady, nemese oblystar, respýblıkalyq mańyzy bar qalalar men astana ákimderi aktileriniń kúshin joıady, ne qoldanylýyn tolyq nemese ishinara toqtata turady.

Nege májilis?

Ata zańnyń 56-babynda májilistiń qaraýyna palata depýtattarynyń jalpy sanynyń kópshilik daýsymen prezıdentke premer-mınıstrdi taǵaıyndaýǵa kelisim berý jatatyny kórsetilgen.  

Úkimet qalaı qurylady

Konstıtýsıanyń 65-babyna sáıkes Qazaqstan Respýblıkasynyń prezıdenti úkimetti Ata zańda kózdelgen tártippen qurady.

Mınıstrler kabınetiniń basshysy taǵaıyndalǵannan keıingi on kún merzim ishinde premer-mınıstr úkimettiń qurylymy men quramy týraly prezıdentke usynys engizedi.

Úkimet músheleri Qazaqstan halqy men prezıdentine ant beredi.

Úkimet nege otstavkaǵa ketti?

Qazaqstan prezıdenti Nursultan Nazarbaev beısenbi, 21 aqpan kúni respýblıkanyń onynshy premer-mınıstri Baqytjan Saǵyntaev basqarǵan úkimetti otstavkaǵa jiberdi.

Memleket basshysy osy máselege qatysty jasaǵan málimdemesinde úkimet pen Ulttyq bank el ekonomıkasyn sapaly damytýǵa serpin beretin naqty quraldardy tolyqqandy jasap shyǵara almaǵanyn atap ótti. Prezıdenttiń aıtýynsha, júıeli jumys júrgizilmegen, turǵyndardyń naqty tabysy óspedi, otbasylardyń búdjetinde azyq-túlikke degen shyǵyn kólemi arta tústi. Atqarýshy organdardyń salǵyrttyǵynan áleýmettik turǵydan az qamtylǵan turǵyndardyń bir bóligi ataýly áleýmettik kómekpen qamtylmaǵan.

Onyń ústine, Nazarbaevtyń pikirinshe, Úkimet músheleri, mınıstrler, ákimder halyqpen jumys isteı almady, sondaı-aq jurtshylyqtyń problemalaryna qulaq asyp, atqarylyp jatqan ister men saıasatty túsindirý jumystaryn júrgizýge shamasy kelmedi.

Premer-mınıstrdiń mindetin ýaqytsha atqarý Asqar Mamınge júkteldi.

Memleket basshysy 27 aqpanda ótetin "Nur Otan" partıasynyń sezinde jańa úkimettiń mindetteri týraly tolyǵyraq aıtýǵa ýáde berdi.

Usynǵan: Nazerke Labıhan