«Qudaı joq» degen kez kelgen adamnyń ózi qandaı da bir jaratýshy kúshtiń baryna, on segiz myń ǵalamdy áldebir jaratýshy kúshtiń basqaryp turǵanyna kúmán keltirmeıdi. Óıtkeni kúndelikti ómirdiń ózinde adam túsindirip bere almas, tylsym qupıa qubylystarǵa jıi kez bolamyz. Máselen bazary jıi órtenetin Almatynyń baraholkasynda jaqynda «Adem» saýda úıi órtengeni belgili. Alaıda 25 myń sharshy metrdi kúlge aınaldyrǵan órt kezinde saýda úıiniń namazhanasyn tilsiz jaý aınalyp ótipti. Saýda úıiniń ishinde gaz balony jarylyp, qurylys materıaldary men ishindegi manekenderdiń túrli ýly gazdar shyǵaryp, alapat órttiń temperatýrasy 270 gradýsqa jetkenin eskersek, «Ademniń» namazhanasynyń órtten aman qalýy kezdeısoq sáttilik emes sekildi. Jalpy mundaı «kezdeısoqtyq» birinshi ret emes. Kýágerler Shymkenttegi «Bekjan» bazary órtke oranǵanda da namazhanasynyń órtten aman qalǵanyn aıtady. 2010 jylǵy 12 naýryzda Almaty oblysy Aksý aýdanynyń Qyzylaǵash aýylynda bolǵan sý tasqyny kezinde turǵyn úılerdiń 70 paıyzy qırap, 45 adam qaza tapty. Áıtse de bıiktigi 3 metrge deıin jetken sý aýyldaǵy meshitti aınalyp ótken. Jan jaǵyndaǵy úılerdiń bárin jermen jeksen etip shaıyp ketkende úıindilerdiń ortasynda shaǵyn meshit din aman qalǵan. Alysqa barmaı-aq 1910 jyly Taldyqorǵan aımaǵynda úlken jer silkinisi boldy. Sol apattan qıraǵan úılerdiń ortasynda Járkent meshiti qasqaıyp tik turdy. Bizdiń elimizde ǵana emes mundaı tańǵajaıyp qubylys basqa elderde de jıi tirkeletin kórinedi. Máselen Ázirbaıjan Respýblıkasynyń Zaǵatal aýdanyndaǵy bes bólmeden turatyn eki qabatty jekemenshik úı otqa oranǵan. Órt tańǵy saǵat 04:56-da bastalyp, úı ıelerin 85 myń manat turatyn dúnıe-múlkinen aıyrǵan. Alaıda barlyq dúnıe-múlik túgi qalmaı janyp ketkenimen úıdiń ishindegi qasıetti Quran ottan «aman» qalypty. Saýd Arabıasynyń Jazan qalasynda da otqa oranyp, tek qańqasy qalǵan avtokóliktiń ishindegi qasıetti Quran ǵana jalynnan aman qalǵan. 2005 jyly Indonezıada sýnamı bolǵan kezde búkil meshitter aman qaldy. Aınalasynda birneshe shaqyrymda bir terek qalmaǵanda Banda Acheh qalasyndaǵy aq meshit aman qalǵan bir ǵana ǵımarat edi. 2005 jyly Shrılanka men Ońtústik Azıaǵa lap qoıǵan tasqyndy ǵaryshtan túsirgen ǵalymdar tań qalyp, jaǵalaryn ustady. Óıtkeni jaǵaǵa jaqyndaǵan alyp tolqyndardan arab tilinde «Alla» degen jazýdy oqýǵa bolatyn edi. 1999 jyldyń 17 tamyzynda Túrkıada bolǵan jer silkinisi myńdaǵan adamnyń ómirin qıdy. Sol jerde Stambýldaǵy Súleımen meshiti dir etken joq. Qytaı elinde 1931 jyly bolǵan tasqyn 4 mıllıon adamdy jutty. Alaıda Sán úlken meshiti de bul zulmattan aman qaldy. Jalpy, túrli topan sý, jer silkinisi, órt, daýyl bolǵan kezde meshitter, nemese quran aıattary din aman qalatyny qalaı? Allanyń qudireti demeske shara joq...
Janarbek Maǵzamuly, Facebook paraqshasynan
