Qazaqstan prezıdenti Nursultan Nazarbaev parlament májilisiniń plenarlyq otyrysyna qatysty, dep jazady Qamshy.kz aqparat agenttigiAqordanyń baspasóz qyzmetine silteme jasap.

Parlament májilisiniń plenarlyq otyrysynda Qazaqstan prezıdenti Nursultan Nazarbaev úkimettiń jahandyq damýdaǵy qıyn-qystaý jaǵdaıda ekonomıkalyq ósimge qol jetkizgenin atap ótip, onyń múshelerine atqarǵan jumysy úshin alǵys bildirdi.

"Premer-mınıstr Baqytjan Saǵyntaev týraly jeke aıtyp óteıin. Ol burynǵy qyzmetinde – Pavlodar oblysynyń ákimi, ekonomıka mınıstri, vıse-premer jáne birinshi vıse-premer retinde ózin jaqsy jaǵynan kórsetti. Adal ári tájirıbeli azamat. Basqa salalarda da eńbek ete alady. Alaıda jekelegen mınıstrlikterdiń jumysyndaǵy, ásirese áleýmettik saladaǵy kemshilikterdiń saldarynan búkil úkimet otstavkaǵa jiberildi", - dedi Qazaqstan prezıdenti.

Nazarbaev atap ótkendeı, halyqaralyq arenadaǵy tereńdep bara jatqan turaqsyzdyq pen sanksıalyq qaqtyǵystar elimizdiń ál-aýqatyn arttyrýda jańa qadamdar men sheshimder izdeýdi talap etedi.

Budan bólek, memleket basshysy saıası jańǵyrtýdyń nátıjelerine toqtalyp ótip, sonyń aıasynda bılik tarmaqtary arasyndaǵy ókilettiktiń qaıta bólingenin aıtty.

"Úkimet barlyq qajetti ókilettikti aldy, halyq aldynda mindetterin naqty oryndap, óz jumysy úshin jaýapkershilikti moıynyna alýǵa tıis. Bul jaýapkershilik búkil deńgeıdegi ákimderge qatysty, olar áleýmettik jáne ekonomıkalyq baǵdarlamalardyń tıimdiligine tikeleı jaýap beredi. Halyqtyń aryz-shaǵymyna tez jaýap berip, eń bastysy, sharalar qoldanýy kerek", - dedi prezıdent.

Nursultan Nazarbaev memlekettiń áleýmettik-ekonomıkalyq saıasatyn júzege asyrýdaǵy parlamenttiń rólin de erekshe atap ótti.

"Áńgime zań jobalaryn sapaly ázirleý ǵana emes, sondaı-aq mańyzdy memlekettik baǵdarlamalar men jobalardy iske asyrý jóninde bolyp otyr. Bul sonymen qatar turaqty parlamenttik monıtorıń, úkimettik emes sektormen dıalogtik alańqaı qurý, azamattarǵa memleket qabyldap jatqan sharalardy, onyń ishinde zańnamalyq sheshimderdi túsindirýge de qatysty", - dedi Qazaqstan prezıdenti.

Memleket basshysy atap ótkendeı, jańa úkimet memlekettik baǵdarlamalardy júzege asyrýdy jalǵastyryp, quqyq qorǵaý jáne sot júıesindegi reformalardy aıaqtap, halyqtyń problemalaryn sheship berýi tıis.

Nursultan Nazarbaev Konstıtýsıanyń 44-babyna sáıkes Qazaqstan Respýblıkasy premer-mınıstri laýazymyna taǵaıyndaýǵa kelisim berý úshin Asqar Mamınniń kandıdatýrasyn parlament májilisiniń qaraýyna usyndy.

"Ol jumys istegen jyldary ózine senip tapsyrylǵan qyzmetterde naqty nátıjelerge qol jetkizdi. Asqar Uzaqbaıuly ózin tájirıbeli menedjer retinde kórsetti. Jańa Úkimettiń tıimdi jumysyn qamtamasyz etý úshin Asqar Uzaqbaıuly Mamınniń kandıdatýrasyn laıyqty dep sanaımyn", – dedi memleket basshysy.

Parlament májilisiniń depýtattary premer-mınıstr laýazymyna Asqar Mamınniń kandıdatýrasyn biraýyzdan maquldady.

Plenarlyq otyrys barysynda Nursultan Nazarbaev Asqar Mamındi Qazaqstan Respýblıkasynyń premer-mınıstri laýazymyna taǵaıyndaý týraly tıisti jarlyqqa qol qoıdy.

Elbasy áleýmettik saıasatymyzdyń negizgi basymdyqtary jóninde aıtyp, ındýstrıalyq baǵdarlamany oryndaý barysynda otandyq óndiristi damytý qajettigine nazar aýdardy.

Usynǵan: Nazerke Labıhan