Qazaqstandy álemge tanytqan ózin "qazaqpyn" deıtin naǵyz patrıot Gennadıı Golovkın meksıkalyq boksshy Saýl "Kanelo" Alvarespen úshinshi kezdesý ótkizýge daıyn. Biraq qarsylasyna últımatým qoımaqshy, - dep habarlaıdy Qamshy.kz aqparat agenttigi WorldBoxingNews-ge silteme jasap.
Jýrnalıs Fıl Djeıdiń aıtýyna qaraǵanda, Golovkın ózin "jeńildim" dep sanamaıdy jáne Kanelo tartyp alǵan belbeýlerdi qaıtarýdy josparlaǵan eken.
Qos boksshynyń ókilderi kelissózderdi bir kezdeskennen-aq sheship tastamaıtyny aıdan anyq. Sebebi, Golovkın jekpe-jekti Las-Vegastan basqa jerde uıymdastyrýdy talap etip otyr.
Nú-Iork, Los-Andjeles jáne Tehas shtatynda da jekpe-jek uıymdastyrýǵa bolady eken. Qos boksshynyń kezdesýine Eýropa elderiniń birinde jabylatyn shatyry bar fýtbol stadıon da laıyqty bolýy múmkin.
Basylym málimetinshe, GGG DAZN strımıngtik servısimen kelisimshart týraly kelisimge kelgen. Ol týraly kelesi aptanyń basynda resmı túrde jarıalanatyn bolady.
Golovkın rıngke mamyr nemese maýsym aıynda qaıta oralady dep kútiledi. Al kelisimshartta kem degende eki jekpe-jek ótkizedi delingen. Biraq aldaǵy ýaqytta bes nemese alty jekpe-jekke deıin artýy múmkin. Ol qazan aıynda bes jyl boıy 11 jekpe-jekte qyzmet kórsetý kelisimshartyna qol qoıǵan bolatyn.
Eske sala ketsek, YouTube-taǵy Counter Punch Boxing kanalynyń avtory naqty derekkózge súıene otyryp, qazaqstandyq Gennadıı Golovkın men meksıkandyq Saýl "Kanelo" Alvares úshinshi kezdesý týraly kelisimge keldi degen edi.
Avtordyń aqparatyna súıensek, ol kezdesý 2019 jyldyń qyrkúıek aıynda Mahıkonyń "Asteka" stadıonynda ótedi.
"Árıne, oǵan deıin bári kúrt ózgerýi múmkin. sebebi, bul - boks. Golovkın jeńilýi múmkin, ol "Kaneloǵa" da qatysty joramal. Biraq dál qazirgi jaǵdaı mynandaı: Gennadıı DAZN-ben kelisimshartqa qol qoıdy jáne qyrkúıekte "Kanelomen" jekpe-jekke shyǵady. Sondyqtan, bir shaıqas bolary anyq.
Eger bul aqparatty naqty qandaı derekkózden alǵanymdy aıtsam, sózsiz, sózime senetin bolasyzdar. Bul – naǵyz senimdi derekkóz. Muny aıtqan adam dál sol jekpe-jekke qatysy bar, sol shaıqasta qyzmet atqaratyn adam. Sondyqtan, bul aqparatqa esh kúmán bolmasyn" - dep sózine sendirgisi keldi avtor.
Usynǵan: Maqpal Sembaı
