-Estidiń be?
-Neni?
-Estimediń be ne?
-Neni estýim kerek edi?
-Anaý Maǵırash bar ǵoı, sol she, ne ǵoı...
-Iá, ne bolypty oǵan?
-Estimediń be ras?
-Túf, aıtasyń ba, joq pa?
-Turmysqa shyqqaly jatyr eken ǵoı. Toıyna shaqyrdy ma?
-Joq.
-Mássaǵan! Qaljyńdamashy! Ras pa?! Seni, jan "podrýjkasyn" shaqyrmady ma ne? Sumdyq qoı! Nege óıtti eken? Qyzyq boldy munysy. Onsha aralaspasam da, meni shaqyryp, seni shaqyrmaǵany durys bolmady. Sender mektepten dos emes pe edińder? Ótkende ǵana birge kóılek alyp júrmiz dep edi ǵo. Renjisip qaldyńdar ma? Meıli, qansha jerden renjisseńder de kórshisi, bala-baqshaǵa birge barǵan, mektepte birge oqyp, dos bolǵan qurbysyn qalaı shaqyrmaýǵa bolady? Álde bolashaq kúıeýi seni unatpaı qaldy ma eken. Báribir túsinbeı turmyn nege olaı etkenin. Men sol, sen ne kıgeli jatyr eken dep, bilip qaıtaýǵa kelip em. Renjimeshi. Kóńilińdi túsirdim be? Men seni shaqyrmaǵanyn bilmedim. Seni renjiteıin de demedim. Ony bilgende, toı týraly aıtpas edim saǵan. Jan qurbysyn shaqyrmaǵan adamdy birinshi ret kórip turmyn. Sosyn toı sýretterin jiberemin ǵoı saǵan. Kimder barǵanyn, kim qalaı ózgerip ketkenin aıtyp beremin. Mektep bitirgeli jeti jyl boıy kórmegen synyptastar da keletin shyǵar. Bári ózgerip ketken shyǵar. Sen qapalanba, jaraı ma, saǵan bárin kıno kórgendeı etip aıtyp beremin. Toıbastar ala kelemin. Men Maǵırashtan seni nege shaqyrmaǵanyn jaılap surap kóremin. Sosyn aıtamyn ǵoı saǵan. 
-Boldyń ba?
-Neni?
-Aıtaryńdy aıtyp boldyń ba?
-Túf, kóńilińdi túsireıin demedim. Birge baramyz dep oılap em. Seni toıǵa shaqyrmaǵanyn-aı. Shynymen, saǵan janym ashyp tur. Qanshama synyptastardy kórý "baqyty" buıyrmaı turǵany. Ókinishti-aq...
-Iá, men toıǵa barmaımyn. Shaqyrǵan da joq. Biraq sol jerde mindetti túrde bolamyn. Shaqyrýsyz-aq baramyn.
-Barasyń ba sonda? Kópshiliktiń kózinshe ursysyp júrme Maǵırashpen. Shaqyrylmaǵan jerge barǵan uıat emes pe? Sen oılanyp kórseı...
-Alańdama, men toıdyń bas-aıaǵynda bolamyn. Sebebi, ol meniń jeńgem bolady...
-...

Sizdiń de osyndaı bir tıyn berip sóıletip, on tıyn berip qoıdyra almaıtyn qurbyńyz bar ma?

Maqpal Sembaı