Las-Vegasta aýyr atletıkadan jasóspirimder arasyndaǵy álem chempıonatynda qazaqstandyq komanda bes altyn medal utyp aldy, - dep habarlaıdy Qamshy.kz aqparat agenttigi Aýyr atletıka federasıasynyń baspasóz qyzmetine silteme jasap.

Qazaqstan quramasynyń taǵy eki sportshysy komanda qorjynyna altyn júlde alyp keldi. 81 kelige deıingi salmaqta Olga Pastýhova eki jattyǵý qorytyndysy boıynsha 215 (julqa kóterýde - 92, serpe kóterýde - 123) kelini baǵyndyryp, álem chempıony ataǵyn kezekti ret aldy.

Rahat Bekbolat ta álem chempıonatynda baq synady. 96 kelige deıingi salmaqta synǵa túsken ol qossaıys nátıjesi boıynsha 323 kelini (julqa kóterýde - 144, serpe kóterýde - 179) kóterip, moınyna altyn medal taqty.

"Jasóspirim sportshylarymyz osy saıystarda óz kúsh-qýattaryn kórsete aldy. Árıne, komandadaǵy alǵashqy jeńister Olga men Rahatty odan saıyn jigerlendirip jiberdi. Olar sol deńgeıdi túsirmeý kerek ekenin túsindi. Jaqsy kóńil-kúı, tabandy jattyǵýlarymyz - osynyń bári chempıonatta altyn medal alyp keldi. Komandamyzdaǵy eń jas sportshy Rahat Bekbolat úshin bul debút bolǵan, ol bizdi nátıjesimen qýanta aldy", - dedi jastar quramasynyń bas bapkeri Baqyt Ahmetov.

Jalpy esepte Qazaqstan bes medal enshilep, senimdi jeńiske jetti.

Jalpy esep:

1.Qazaqstan - 5-0-0;

2.Ózbekstan - 2-3-1;

3.Vetnam - 2-0-1.

Buǵan deıin jasóspirimder arasyndaǵy álem chempıonatynda Qazaqstannyń qorjynyna altyndy Aqmolda Saıramkez (61 kelige deıingi salmaq), Saıhan Taısýev (67 kelige deıingi salmaq) pen Sápı Esengeldi (81 kelige deıingi salmaq) ákelgen bolatyn.

Aýyr atletıkadan Las-Vegasta ótip jatqan álem chempıonaty 15 naýryzda aıaqtalady. Bul chempıonatta 50 elden 13-17 jas aralyǵyndaǵy eki júzden asa sportshy qatysyp jatyr. Qazaqstannyń atynan bes sportshy óner kórsetti.

Usynǵan: Maqpal Sembaı