35 jastaǵy Nargıza Rahımova 8 naýryz merekesi qarsańynda Azattyqtyń Ózbek qyzmetiniń Facebook-taǵy paraqshasynda musylmandardyń kóp áıel alýy jaıly jazba astyna pikir qaldyrǵannan keıin synǵa ushyraǵan.
DAÝDYŃ BASY...
Daý Hayot Baxtiyor O'gli esimdi qoldanýshynyń tómendegideı pikirinen bastalǵan.
“Tipti bir áıelge ıe bola almaǵan ynjyq erler men kúıeýiniń moınyna esekke mingendeı otyryp alatyn kókbet áıelder ǵana kóp áıel alýǵa qarsy shyǵady” dep jazdy ol.
Al Nargıza Rahımova oǵan “Hadısha anamyz tiri kezinde Paıǵambarymyz ekinshi áıel alǵan joq. Bilmeımin, bálkim ol kezde ańqaý bolǵan shyǵar, múmkin Hadısha anamyz shataq shyǵarýǵa beıim boldy ma eken, bul jaǵyn siz jaqsyraq bilesiz ǵoı. Haziret Álı de Fatıma anamyz tiri kezinde ekinshi áıel almaǵan. Bul árıne, óte kúlkili jaǵdaı ǵoı” dep jaýap bergen.
Osydan soń sheneýnikke qarsy ondaǵan komentarı men vıdeomálimdeme paıda bolyp, keıbiri Rahımovany "óltiremiz" dep te qorqytqan. Qoqan-loqy sıpatyndaǵy pikirler arasynda onyń kúıeýi men tórt balasyna qarsy baǵyttalǵan komentarıler de bolǵan.
Al Ózbekstannyń quqyq qorǵaý organdary komentarı avtorlaryn anyqtaı bastaǵan.
Keıinirek naýryzdyń 9-y kúni jergilikti Azon TV arnasy Nargıza Rahımovanyń kópten keshirim suraǵan vıdeomálimdemesin jarıalady.
“Men, Qudaıdyń qarapaıym quly retinde barsha musylmandarǵa kóptiń ashýyn týǵyzǵan pikirlerim úshin shyn nıetpen keshirim suraımyn” degen ol vıdeomálimdemede.
Qoqan-loqyǵa baılanysty ol áleýmettik jelidegi barlyq akkaýnttaryn óshirip tastaǵan.
Fergana saıty Ózbekstan prezıdenti Shavkat Mırzıeevtyń vırtýaldy qabyldaýyna Rahımovany jazalaýdy talap etken júzdegen shaǵym túskenin jazdy.
Al Ózbekstannyń din isteri jónindegi komıteti "azamattardyń dinı senimine til tıgizý zańda kórsetilgen tártippen jazalanatyny" týraly málimdeme jasaǵan.
Ázirge sheneýniktiń "jazalanǵan-jazalanbaǵany" týraly derek joq.
Usynǵan: Farıza Jomartqyzy
Pikir qaldyrý