Kóp balaly úı órtke oranyp, anasy men balalary áreń degende qutylyp shyqqan. Qazir olar sheneýnikter bólgen ýaqytsha úıde turyp jatyr, dep jazady Qamshy.kz aqparat agenttigi Moı gorod saıtynyń deregine súıenip.

9 naýryz kúni Aqtóbede 5 balasy bar úı órtke oranǵan. Belgili bolǵandaı, balalarynyń eń kishkentaıy 4 jasar bolsa, eń úlkeni 15 jasta eken. Bul otbasynyń tek otaǵasy ǵana jumys isteıdi eken, sondyqtan órt shyqqan kezde ol úıinde bolmaǵan, al anasy balalarymen áreń degende órtten qutqarylyp shyqqan.

Bes balanyń anasy terezeni syndyryp tórt balasyn syrtqa shyǵarǵan, besinshisin endi shaǵaraıyn dep jatqanda tútinnen ýlanyp, esinen tanyp qalypty.

«Men 9-y kúni jumysqa ketken bolatynmyn, al 15 jastaǵy úlken qyzym kórshilerge barǵan. Órt saǵat 10:00 shamasynda bastalypty. Qyzym dereý úıge kelgeni durys bolypty, sol áıelim men kishkentaı qyzymdy syrtqa alyp shyqqan», - deıdi bes balanyń ákesi Zeınýlla Bekmaǵambetov.

Órtengen úıdiń tek kúli ǵana qalǵan. Jergilikti sheneýnikter bul otbasyǵa ýaqytsha eki bólmeli páter beripti.

«Órtten zardap shekken otbasyǵa jer beremiz, keıin demeýshilerdiń kómegimen jańa úı salýǵa qural-jabdyqtar alamyz», - dedi Aqtóbe ákimdiginde.

Belgili bolǵandaı, órt AZS aýdanynda oryn alǵan. Saıjaılar ýchaskesinde 80 sharshy metr órtengen. Ýly gazben ýlanǵan bolýy múmkin dep 16 jastaǵy jasóspirim aýrýhanaǵa jatqyzyldy. Órttiń naqty sebepteri anyqtalýda.

Oblys ákimi Ońdasyn Orazalın órt bolǵan jerge kelip, jaǵdaıdy óz kózimen kórdi de, ákimdiktegilerge zardap shekken otbasyǵa barynsha qoldaý kórsetýge tapsyrma berdi. Bul úshin arnaıy komısıa da qurylǵan, zardap shekken otbasy múshelerimen búginde psıhologtar jumys isteýde.

Usynǵan: Nazerke Labıhan