Senat depýtaty, halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva Reseıdiń Federaldy jıyny Federasıa keńesiniń qorǵanys jáne qaýipsizdik komıteti men halyqaralyq ister komıtetiniń tóraǵalarymen kezdesý kezinde reseılikterge Amal merekesin túsindirip, ázildesti dep jazady Qamshy.kz aqparat agenttigi Sputnik Qazaqstan saıtynyń deregin negizge alyp. 

Qorǵanys jáne qaýipsizdik komıtetiniń tóraǵasy Vıktor Bondarev áriptesi Darıǵa Nazarbaevany ótken 8 naýryz – Halyqaralyq áıelder kúnimen quttyqtady.

"Eshten kesh jaqsy degen. Sondaı-aq, quttyqtaýǵa búgingi kún de jaman emes dep sanaımyz. Tarıhtan biletinimdeı, búgin Qazaqstanda Jańa jyl bastalady", - dedi Bondarev.

Osy kezde sózge aralasqan Darıǵa Nazarbaeva Reseıden kelgen áriptesterine búgin kún qandaı mereke ekenin túsindirdi.

Búgin – Kórisý kúni, bul bizdiń dástúrli merekemiz, erteden toılanady. Bizdiń ata-babalarymyz kóshpeli ómir saltyn ustanǵanyn bilesizder. Sol kezde qytymyr qysta bir-birin kóre almaǵan. Kún jylynyp, qar erı bastaǵan kezde, qystan aman-esen shyqqanyn toılap, bir-birimen qushaqtasyp kórisken", - dedi senator.

"Biz de qystan aman shyqtyq. Mindetti túrde qushaqtasyp kórisemiz",- dep kúldi Bondarev.

"Osy eki kún boıy qushaqtasamyz. Siz de, biz de qystan aman-esen shyqtyq. Bizde bıyl 45 gradýsqa deıin aıaz boldy", - dep ázildedi Nazarbaeva.