Bul meniń ákem. Osydan 2 jarym aı buryn aıyqpas dert bul ómirden alyp ketpegende ákem búgin 72 jasqa tolar edi. Ol shalǵaı aýyldardyń turǵyndary taza sý ishsin dep jerasty sýlarynyń syzbasyn salǵan. Sondaı-aq qazir bas ınjener-dızaıner Bazarbek Jumabektiń jobasy arqyly júzege asqan qudyqtardan sý ishken árbir adam ákeme ishteı alǵys aıtyp júredi. Men ákemniń týǵan kúnine oraı oǵan hat jazyp otyrmyn. Onyń bul hatty oqıtynyna bek senimdimin. 

Ákeshim, eger siz meni estip, kórip otyrsańyz, sizdi maqtan tutatynymdy bilińiz. Biz sizdi qatty jaqsy kóremiz. Anam ekeýińiz meni adal, adamgershiligi mol adam qylyp tárbıeledińizder. "Elge paıdań tısin, adamdarǵa paıdań tısin" dep úırettińizder. Men sizder artqan úmitti aqtaýǵa tyrysamyn. 

Áke esińizde me, siz maǵan stýdent kezimde "biraz jyldardan keıin sen arqyly basqa adamdardyń taǵdyry sheshiletin kún týady. Sol kezde sen zańǵa baǵynatyn, elge qyzmet etip, ádiletti tý etken azamat bolýyń kerek. Basqa adamdarǵa emes zańǵa ǵana baǵyný – seniń basty mindetiń. Eger sen elińdi súıseń, halqyńdy súıseń - meniń úmitimdi aqtaǵanyń",- dep ediń. Men bul sózderińdi eshqashan umytpaımyn. 

Sizge eń basty sózdi aıtaıyn, áke! Siz aspanda meni maqtan tutatyn bolasyz. Men zańǵa qyzmet etýge, halyqqa qoldan kelgenshe kómek kórsetýge bar ǵumyrymdy arnap kelemin. Buǵan ókinbeımin de. Men bul mindetti ómir boıy zor maqtanyshpen oryndaýǵa ázirmin. Jer máselesi asa kúrdeli ekenin bilemin. Siz árdaıym maǵan adal bol jáne abaı bol dep aıtatynsyń. Men barynsha saqpyn ári adalmyn. Menen kómek suraǵandardyń bárine qolymnan kelgenshe qol ushyn sozýdamyn. Seniń ár jazbamdy oqyp, qandaı ister atqaryp jatqanymdy qadaǵalyp otyrǵanyńdy bilemin, sezemin. Qazir hatty kózimniń jasyn tyıa almaı jazyp otyrmyn. Bul hatty qalaı oqıtynyńnan da habarsyzbyn. Bul hatty qalaı jibersem bolady? Ushaqtar ushpaıtyn, poıyzdar bara almaıtyn jaqqa... Biraq týǵan kúnińde bul hatty oqıtynyńa senemin. 

Ákeshim, bilesiz be, eńbegińizdiń jemisin kórip úlgergenińizge qýanyshtymyn. Qýanyshty jıyndarda, týǵan-týystyń ortasynda men týraly áńgime qozǵalǵan kezde meni maqtan tutatynyńyzdy jıi aıtatyn edińiz. Keıde jaı ǵana maqtaıtynsyz. Biraq bul men úshin óte mańyzdy edi. Men sizdiń úmitińizdi aqtaǵanyma rızamyn. Sizdi dertten qorǵap qala almaǵanymyz úshin keshirim suraımyn. Men, anam, Jazıra jáne aǵam bar amaldy qarastyrdyq. Qolymyzdan kelgenin jasap baqtyq, alaıda bul Qudaıdyń qalaýy boldy. Sizdiń ornyńyz oısyrap qaldy. Sizdiń joqtyǵyńyz qatty bilinedi. Túsimde sizdi jıi kóremin. Múmkin únemi qasymyzda ekenińizdi eskertkenińiz shyǵar. Siz menimen maqtanǵansyz, áli de maqtan tutatyn bolasyz! Men sizdi jaqsy kóremin!

Tanymal zańger Baqytjan Bazarbektiń feısbýk paraqshasynan alynǵan

Aýdarǵan: Ásel Bolatqyzy