Zeınetkerlikke shyǵýyna nebári eki-aq aı qalǵan aýylsharýashylyǵy mınıstrligine qarasty Sý resýrstary komıtetiniń basshysy Islam Ábishev 60 mln. teńge aldy degen kúdikke ilindi dep habarlaıdy Qamshy.kz aqparat agenttigi.
Islam Ábishev buǵan deıin Ońtústik Qazaqstan oblysyndaǵy Ordabasy aýdanynyń ákimi, OQO ákiminiń birinshi orynbasary, Óskemen qalasynyń ákimi qyzmetterin atqarǵan. Ózine tıesili «Batsý» korporasıasynyń prezıdenti qyzmetin atqaryp júrgende Islam Álmahanulyn 2000 jyly alǵash ret memlekettik qyzmetke tartyp, Ordabasy aýdany ákimi etip taǵaıyndaǵan. Ońtústik Qazaqstan oblysynyń sol kezdegi ákimi Berdibek SAPARBAEV bolatyn. Keıinirek Berdibek Saparbaev Shyǵys Qazaqstan oblysynyń ákimi qyzmetine taǵaıyndalǵannan keıin I. Ábishev Óskemen qalasy ákiminiń kreslosyna otyrdy.
Esterińizge sala ketsek Islam Álmahanuly aýylsharýashylyǵy mınıstrligine qarasty Sý resýstary komıtetine tóraǵa bolyp eki márte taǵaıyndalǵan.
Qanysh Sátbaev atyndaǵy kanal» RMKK-nyń dırektory Turǵanbaı SÁRSENBAEV: Islam Ábishev Qaraǵandyǵa kelgen saparynda týǵan kúnime asta-tók dastarhan jaı degen soń 98 myń teńgege dastarhan jasadym, odan ákimdikte ótetin jınalysqa qatysatyn bolǵandyqtan maǵan kostúm-shalbar satyp alyp ber dep tikeleı tapsyrma berdi, amal joq, kostúm-shalbar alyp berdim» dep, aıyptaǵan. Degenmen, keıinnen bul aıyptar dálelsiz bolyp shyqty.
2013 jyldyń shilde aıynda Islam Ábishev Sý resýstary komıtetiniń tóraǵasy qyzmetinen bosatylyp qalǵannan keıin bir jyldan keıin Islam prezıdent Nursultan NAZARBAEVTYŃ ózi qabyldap, 2014 jyldyń tamyz aıynda qyzmetine qaıta taǵaıyndaǵan. Jalpy alǵanda Islam Ábishev Ońtústikte, Shyǵysta qyzmette júrgende iskerligimen tanylyp jańashyl basshy atanǵan.
Endi bul jolǵy daýda Islam Ábishev 60 mıllıon teńgeni konkýrstan «otkat» retinde alǵan kórinedi. Soltústik Qazaqstan oblysy, Qyzyljar aýdanyndaǵy Sokolov toptyq sý qubyry men aýyldyq jerdegi sý taratý júıesiniń qurylysyn jańǵyrtý boıynsha 6 mlrd teńgege konkýrs uıymdastyrylǵan. Komıtet tóraǵasyna berildi delingen 60 mıllıon teńge sol konkýrs úshin berilgen «aýyzbastyryq» sıaqty. Sonda Ábishevke 6 mlrd teńgeniń 1 paıyzy berilgen bolyp tur ǵoı.
Sondaı-aq, ol «otkatty» tikeleı ózi almaǵandyǵy jáne onyń bólshektep berilgendigi de aıtylady. Alǵashqy 10 mıllıon teńgesi eki bólinip, «Qazaq kúresi» federasıasynyń vıse-prezıdenti Serik Tókeev arqyly alǵan. Islam Ábishev dál osy federasıanyń prezıdenti qyzmetin qosa atqaryp júrgen bolatyn. 60 mıllıon teńgeniń eń sońǵy bóligi, ıaǵnı, 50 mıllıon teńge 14 naýryz kúni Islam Ábishevtiń inisi, Túrkistan oblysynyń bıznesmeni Qanybek Ábishevke berilgen kórinedi. Sodan soń Sý resýrstary komıtetiniń tóraǵasy qamaýǵa alynǵan. Aıta keteıik, «Sý resýrstary komıtetin jeti jyldaı basqaryp kelgen Islam Ábishevti sol kezdegi mınıstr Asyljan Mamytbekov taǵaıyndaǵan bolatyn. Aýylsharýashylyǵy mınıstrliginiń jaýapty hatshysy qyzmetin atqaryp júrgen Mamytbekovtyń ózi jaqynda jumysynan bosap qaldy. Onyń qyzmetinen ketýine bul jaǵdaıdyń qatysy bar-joǵy ázirge belgisiz.
Usynǵan: Farıza Jomartqyzy
