Atyraýlyq “Aqjaıyq” basylymy osy aptada Jaıyq ózeninde qyrylǵan balyqtar týraly birneshe maqala jarıalaǵan. Olardyń birinde ózendi óli balyqtardan tazartýǵa jergilikti turǵyndardyń da atsalysyp jatqany aıtylady. 

Naýryzdyń 11-i kúni jarıalaǵan maqalada basylym “eń optımıs sarapshylardyń boljamy boıynsha, balyq qoryn 2018 jylǵy deńgeıge deıin qalpyna keltirý úshin kem degende úsh-bes jyl qajet” degen mamandar pikirin keltirgen.

“Árıne, qynjylarlyq jaǵdaı. Balyq salasy úshin, balyq aýlaý ónerkásibi úshin bul qasiret. Eń optımısik boljam boıynsha, balyqty qalpyna keltirý úshin kem degende úsh jyl, qarakóz úshin - 2-3 jyl, sazan, kókserke, aqmarqa úshin 5 jyl qajet” degen basylymǵa balyq aýlaý ónerkásibiniń mamany Bostan Súleımenov.

Jaıyq-Kaspıı Orhýs ortalyǵynyń dırektory Shynar İztileýova basylymǵa bergen suhbatynda “mindetti túrde táýelsiz saraptama qajet”, “bılik jurtqa ashyq aqparat jetkizip otyrýy tıis” dep aıtqan.

Al Qazaqstannyń batys óńirinen aqparat taratatyn Mgorod.kz saıty Atyraý turǵyndarynyń Jaıyq ózeninen aýlanǵan balyqtardy satyp alýǵa qatty qorqyp otyrǵanyn jazǵan.

“Munaı astanasyndaǵy kóp bazarda balyq baǵasynyń janyna mindetti túrde “Qıǵash” (Qıǵash ózeninen aýlanǵan) dep jazyp qoıatyn boldy” dep jazdy basylym.

Balyqtardyń jappaı ólýi byltyr jeltoqsannan beri aıtyla bastady. Aýyl sharýashylyǵy mınıstrligi Atyraýda 7-11 naýryz kúnderi Jaıyq ózinen 3,1 tonna óli balyqtan tazartqanyn habarlaǵan.

Atyraý oblystyq polısıa departamenti balyq qyrylýyna baılanysty "Bóten bireýdiń múlkin abaısyzda joıý nemese búldirý" (204-bap, 2-bólim) jáne "Sýdy lastaý, qoqystaý nemese sarqý" (328-bap) baptary boıynsha eki qylmystyq is qozǵaǵanyn málimdedi.

15 naýryzda aqparat jáne qoǵamdyq damý mınıstri Dáýren Abaev memlekettik "Habar" arnasyna bergen suhbatynda "Jaıyq ózenindegi balyqtyń jappaı qyrylýy boıynsha tórt kompanıanyń kúdikke ilingenin" aıtqan.

Onyń sózinshe, arnaýly komısıa "balyqtar qyrylýyna hımıalyq ýlaný sebep boldy" degen qorytyndyǵa kelgen.

Usynǵan: Farıza Jomartqyzy