Zeńgi baba býaz sıyrdyń buzaýynyń túr-túsin týmaı jatyp dál aıtatyn kóripkel, áýlıe bolypty. Jary Ánýar ana da tegin adam bolmapty. Ol Zeńgi babanyń as-aýqatyn daıyndap, adal qyzmet etipti. Tamaq ázirlegende ǵusyl dáretpen pisiredi eken.
Birde as daıyndap jatyp, basyndaǵy jaýlyǵyn túzemek bolady. Sol sátte oramalynan tamaqqa las zattyń bir qıqymy ushyp túskendeı bolady. Ánýar ana «qap» dep, qazandy qansha shaıqasa da, esh nárse taba almaıdy. Tipti «osy arada bolar» dep shamalap, tamaqtan bir-eki ojaý tógip tastaıdy. Biraq kóńilindegi sekem ketpeı qoıady.
Tús mezgili bolǵanda sıyr baǵyp júrgen Zeńgi babamyzǵa as aparyp beredi. Baba aýqattanyp aldy. Kúmánin teksermek bolǵan Ánýar anamyz sút pisirmdeı ýaqyttan soń, Zeńgi babaǵa:
- Anaý býaz sıyrdyń buzaýy qandaı bolady? – dep suraıdy. Baba:
- Túsi qyzyl, mańdaıy qasqa buzaý, - dep jaýap beredi. Ánýar anamyz jymıyp:
- Quıryǵynyń ushy aq, qyzyl buzaý, - deıdi. Zeńgi oǵan bir qarap oılanyp qalady.
Ýaqyty jetkende býaz sıyr Ánýar anamyz sıpattaǵandaı buzaý týady. Zeńgi boljamynyń qate shyqqanyna tańqalyp:
- Neden jańyldym? – dep oılanady. Sol kezde Ánýar anamyz:
- Ótken kúni as daıyndap jatyp, tamaqqa bir nárse túsirip aldym. Qansha izdesem de, taba almadym. Múmkin kózime elestegen shyǵar degen de oı boldy. Sol aspen birge asqazanyńyzǵa baryp, janǵa áser qylǵan. Júrek kózińizge bolmashy perde bop tutylǵan eken. Jatyrdaǵy buzaýdyń quıryǵy mańdaıyn jaýyp jatqan. Sony jete kóre almadyńyz. Meni keshirińiz, - deıdi. Zeńgi baba Ánýardyń mańdaıynan ıiskep:
- Meniń áýlıelik qasıetim seniń qylaýsyz taza qyzmetińmen baılanysty eken. Seniń as-aýqatyń adal bolsa, meniń de rýhym shıraı túsedi, - depti.

Sanjar Kerimbaı,

"Otbasy hrestomatıasy" kitabynan