Almatyda Respýblıka Saraıy aldynda «Sálem, Nur-Sultan! Óse ber, órkendeı ber, Nur-Sultan!» atty myńdaǵan adamdyq konsert ótti, bul sharaǵa astana ataýyn ózgertýge qoldaý bildirgen jastar qatysty, olardyń arasynda sportshylar Qanat Islam, Islam Baıramýkov, otandyq estrada juldyzdary Kámshat Joldybaeva, Kental, Lýına, Rıngo, Azıa, Baqaı toptary jáne basqalary boldy.

Óz sózderinde almatylyq jastar Elbasynyń tarıhı rólin atap ótip, elimizdiń Tuńǵysh Prezıdenti, kóshbasshysy, ıdeıalyq jetekshisi, arhıtektory Nursultan Nazarbaev esiminiń astanaǵa berilýi óte oryndy degendi aıtty.

         «Men ózim qalaǵan ispen aınalysýǵa, bolashaqqa qulash sermeýge múmkindik bergen, ósip-órkendegen Qazaqstanda ómir súrgenim úshin taǵdyryma rızamyn. Biz jastar tarıhı oqıǵalardyń kýási bolýdamyz. Astanamyz óziniń irgetasyn qalaýshy kóshbasynyń esimin alyp, Nur-Sultan atandy, bul úlken qýanysh! Bul - oǵan Otan aldynda, bolashaq urpaq aldynda sińirgen eńbegi úshin kórsetilgen qurmet. Astana elimizdiń júregine, táýelsizdiktiń sımvolyna, bizdiń maqtanyshymyzǵa aınaldy», - dep atap ótti Qazaqstan halyqtary Assambleıasy jastar qanatynyń ókili Dıláram Abdımıtova.

         QR eńbek sińirgen sport sheberi, Olımpıada oıyndarynyń kúmis júldegeri Qanat Islam Tuńǵysh Prezıdenttiń halyqaralyq arenadaǵy zor bedelin aıtty.

         «Men qıyr jaılap, shette ósken qazaqpyn. «Atajurt», «týǵan el», «Táýelsizdik», «Qasıetti Otan» degenniń qadirin syrttaǵy qazaqtan artyq eshkim bilmes. Qazaqstan azat el, Táýelsiz memleket bolǵanda júregimiz jaryla qýanǵanymyz áli esimde. Tuńǵysh Prezıdentimiz Nursultan Ábishuly Nazarbaevtyń da eń aldymen qolǵa alǵany osy syrttaǵy qazaqtardyń jaǵdaıy edi. Dúnıeniń tórt buryshyndaǵy bar qazaqqa saýyn aıtyp, «Qazaqstan – azat el boldy. Atajurtqa oralyńdar. Ózderińe árqashanda eldiń qushaǵy ashyq. Týǵan elimizdi birge órkendeteıik» dep, Uly kóshke jol salǵan bolatyn. Jastaıymnan sportpen aınalysyp, Qytaı elinde talaı bıikterdi baǵyndyrsam da kókeıimnen Atajurt – Qazaq eline oralý nıeti eshqashan ketken emes. «Osynda qal, aldyńda keremet bolashaq kútip tur» degen talaı janashyr jannyń sózine qaırylmaı, bárin tastap baıtaq Qazaqstanyma bir-aq tarttym. Birjola», - dedi Qanat Islam.

Sportshy qazirgi kezde Qazaqstanda sportty damytý úshin barlyq jaǵdaılar jasalǵanyn aıtty, bokstyń arqasynda Qanat Islam álemniń ondaǵan elderinde boldy.

         «Súıikti sportym – bokspen aınalysýyma bar jaǵdaıyn jasady. Sporttyń arqasynda álemniń talaı elinde boldym. Qaı jerge barsaqta qazaq ekendigimizdi bilgen sheteldikter aldymen Elbasymyz Nursultan Nazarbaevty aýzyna alatyn. Sol kezde qazaq bolǵanymyzǵa, dúnıede Qazaqstandaı ǵajaıyp elimizdiń jasap jatqanyna jáne onyń elin súıgen Nazarbaevtaı kóshbasshysy baryna masattanyp, kókiregimizdi maqtanysh sezimi kerneıtin. Astanany Alataýdan Arqaǵa kóshirip, Esildiń boıyna el qondyryp, eńseli elorda, sáýleti men saltanaty kelisken jańa qala salǵan, Qazaqstannyń atyn tórtkúl dúnıege tanytqan Elbasymyzdy qalaı ulyqtasaq ta artyqtyq etpeıdi. Astana qalasynyń ataýyn «Nur-Sultan» dep ataý týraly sheshim óte oryndy dep sanaımyn», - dep atap ótti Qanat Islam.

         «Bas qalamyz – Astana ataýyn «Nur-Sultan» dep qaıta ataýdy zańdy qubylys dep qabyldadym. Óıtkeni Astana – Elbasynyń óz týyndysy. Sporttyq jarystarmen álemdi aralaı júrip kózimniń jetkeni, jańa Qanat Islam baýyrym da aıtyp ketkendeı, sheteldikter úshin «Qazaqstan-Astana-Nursultan» bir uǵym bolyp ketken. Sondyqtan da bul sheshimdi sátti, der kezinde qabyldanǵan dep qoldap-qýattaımyn», - dedi Olımpıadanyń kúmis júldegeri, elimizdiń eńbek sińirgen sport sheberi Islam Baıramýkov.

         Almatynyń eriktiler Lıgasynyń jetekshisi Aısýlý Ernıazova stýdentterdiń ózin-ózi basqarý «G-38»-diń uıymdastyrýymen konsertke megapolıstiń barlyq joǵary oqý oryndarynan 5 myńnan astam jastar qatysqanyn aıtty.

         «Men Tuńǵysh Prezıdent dáýirinde oqyǵan, jumys istegen qurdastarym shynaıy baqytty jandar dep esepteımin. Biz armanǵa aınalǵan qalada - elimizdiń astanasynda talaı márte bas qostyq. Biz osynaý kıeli dástúrdi astanamyz Nur-Sultanda odan ári jalǵastyramyz!», - dep atap ótti sahnadan Aısýlý Ernıazova.