L’Officiel sán jýrnalynyń alǵashqy sanynyń muqabasyna shyǵyp, suhbat bergen elbasynyń kishi qyzy Álıa Nazarbaeva balalyq shaǵy, ápkelerimen qarym-qatynasy jáne prezıdent ákesi týraly aıtyp berdi.

Balalyq shaǵy týraly

Bala kezimde men qyzdardyń ul baladan esh kem túspeıtinin dáleldegim keletin. “Panfılovskıı” keńsharyna kelgen kezimiz esimde. Ákem meni atqa mingizgende qoryqqanymnan jylqynyń jalynan ustap alǵan edim. Ákem bolsa “Jalynan nege ustap alǵansyń? Tizgininen usta! Sen meniń qyzymsyń ba, joq pa?! Qoryqpaýyń kerek” degen bolatyn. Týra sol ádispen ákem meni 5 jasymda júzýge de úıretti. “Jalda!” dep sýda jibere salǵanda, amalsyzdan júzip kettim. Qolymnan kelmegeni ańshylyq boldy. Eń qorqynyshytysy – qabandarǵa túngi ańshylyqqa shyǵýymyz edi. Ákem ázilge basqandy unatatyn. Ol baıqatpaı qamystardy aıaqtarymen shyqyrlatyp, maǵan “abaı bol, qabandar kez-kelgen jerden shyǵa keledi” deýmen boldy. Men dirildep, qumarlyq pen qorqynyshty qatar sezinýmen boldym. Keıin biz qabandar jaıylǵan jerge jettik. Oqtyń dybysyn estı sala men otyra ketip, kózimdi tas jumyp aldym. Basymdy qolymmen búrkep, bári tynyshtalǵanda ǵana ornymnan turdym. Maǵan bul aýyr tıdi. Barlyǵy sondaı ádiletsiz bolyp kórindi!

Ata-anasy týraly

Ákem meni qatty erkeletetin. Sol sebepti men ózimdi ákemniń qyzymyn dep sanaıtynmyn. Ápkelerim ákemniń ákelik sezimderi men týǵanda ǵana oıandy deıdi. Biraq maǵan olaı kórinbeıdi. Ol kezde men jaı kishkentaı bolatynmyn. Ol sol úshin menimen kóp ýaqytyn ótkizetin. Men ákem sekildi ashyq, meıirimdi janmyn. Onyń qatygez bolyp ketpegenine razymyn. El basqaratyn adam úshin bul óte mańyzdy. Anamnan maǵan úılesimdikti izdeýge qushtarlyq qasıeti berildi. Men jańa álemdi tanyp-bilýge qashanda úlken qyzyǵýshylyq tanytamyn. Anam – ıntýısıasy keremet damyǵan, názik jandy adam. Negizinen ákem men anam bir-biriniń aınymaǵan keskini desem de bolady. Olar jarty ǵasyr birge ómir súrgendikten, bir bútinge aınaldy. Ózgeniń qıyndyqtaryna beı-jaı qaramaý – ekeýine de tán qasıet. Bul qasıet maǵan da, ápkelerime de berildi.

Ápkeleri týraly

Men týǵanda olar aqyl toqtatqan úlken qyzdar bolatyn. Sondyqtan qyzǵanysh degen atymen bolmady. Darıǵa ol kezde máskeýlik ýnıversıtetke túsip, tek demalystarda kelip otyratyn. Barlyq ýaqytymdy Dınaramen birge ótkizetinmin. Men ony qatty jaqsy kórdim. Ol mektepke ketken saıyn terezege jaltaqtaýmen bolatynmyn. Men barlyq ýaqytymdy ápkemmen birge ótkizgim keletin. Alaıda ol eseıgende, meniń qasynan shyqqym kelmeıtini onyń mazasyn qashyratyn. Ápkem árıne óz qatarlastarymen ýaqyt ótkizgendi qalaıtyn. Men anamnan Dınaranyń meni ózimen alyp júrýin surap qoımaıtynmyn. Ata-anam Dınaraǵa sol úshin qysym kórsetetin. Ápkemniń oǵan yzasy keletin. Bir sózben aıtqanda ápkeli-sińliler arasynda bolatyn qalypty túsinispeýshilikter. Keıin Darıǵa ekeýi meni tárbıeleýge kiriskende meniń yzam keletin. Qazir ókinishke qaraı bizder ár qalada turyp, bir-birimizdi sırek kóremiz. Biraq men shalǵaıdan da ápkelerimniń qamqorlyǵyn sezinemin. Olar kez-kelgen jaǵdaıda qasymnan tabylyp, qol ushyn berýge ázir ekenine senimdimin.

Prezıdent ákesi týraly

Ákemiz alǵash ret prezıdent bolyp saılanǵanda men 11 jasta edim. Men ol kezde bunyń qanshalyqty mańyzdy ekenin túsine qoımaǵan bolatynmyn. Tek úlken toı bolyp, bizge kóp halyq jınalǵany esimde qaldy. Jaz kezi bolatyn, ákem jap-jas, symbatty, aqshyl sur kostúmde edi…

Sheteldegi oqýy týraly

12 jasymda ákem meni Germanıaǵa oqýǵa jiberdi. Men óte úıjandy bala bolatynmyn. Meni aıaq asty óz ortamnan ajyratyp, ózge elge jiberýi men úshin jaza sıaqty bolyp kórinetin. Mektep burynǵy shirkeýdiń ornynda bolatyn. Kún saıyn telefonnan jylap, meni alyp ketýin suraıtynmyn. Jarty jyldan keıin aqyry elime qaıttym. Bul derbes ómirge alǵashqy qadamym bolatyn. Nemis tilin tamasha meńgerip aldym. Germanıadan keıin Shveısarıaǵa jol tarttym. Birge oqyǵan jerlesterim shetelde júrgenge qýansa, meni týǵan jerime tartyp turatyn. Soǵan qaramastan, shveısarıalyq mektepte 2 jyl oqyp, aǵylshyn tilin úırenip aldym.

Bıznes jaıly

Meniń bıznestegi alǵashqy tájirıbem sý shyǵaratyn Vita zaýytyn iske qosý kezinde boldy. Men ol kezde óndiris dırektory edim. Etıketkasynan bastap, ónimdi satylymǵa shyǵarýǵa deıin basy-qasynda júrdim. Men ózimdi maman retinde kórsete alatyn salany uzaq izdedim. “Evropa+” radıosynda dırektordyń kómekshisi boldym. Bankterdiń birindegi zań departamentinde is-tájirıbeden óttim. Astanada ákemniń hatshysy boldym. Aqyry bızneske bet burdym! Basty sebep – ata-anamnan táýelsiz ómir súrgim keldi. Alǵash bıznes jaıly 19 jasymda oılandym… Birneshe jyldan soń  damýshy kompanıamen birlesip, Luxor-dy sala bastadyq. Telekomýnıkasıamen de shuǵyldandym. Qazaqstanda sandyq baılanysty ornattym. Munymen qosa ınternet-qosymshalardy tehnıkalyq qamtamasyz etýmen aınalysatyn Nursat degen kompanıam boldy.

Kúıeýi týraly

Alǵash kezdeskenimizde men oǵan múldem unamaımyn dep oılatynmyn. Ol meni erke hanshaıym kórip, maǵan tesile qaraýy yzamdy keltiretin. Symbaty maǵan unaǵanymen, ol týraly jaqsy oıda bolmadym. Ekinshi ret kezdeskende ekeýimiz jaqsy sóılesip kettik. Maǵan onyń ózin erkin ustaǵany unady. Tárbıesi de jaqsy. Dımash – óte bilimdi azamat. Amerıka men Italıada bilim alǵan. Birneshe shet tilin meńgergen. Maǵan onyń óz mansabyn eń tómennen, “QazMunaıGazda” jumys isteýden bastap, birtindep kóterilgeni unady. Departament dırektoryna deıin eshkimniń qoldaýynsyz kóterildi. Ózimdi onymen jaıly sezinemin. Men onyń dástúrdi saqtap, úlkender men áıelderge qurmetpen qaraıtynyn qatty baǵalaımyn. Ol balalarǵa da úlken jylylyqpen qaraıdy!

Kúıeýiniń usynys jasaýy jaıly

Bul óte ádemi boldy! 8 mamyrda ol meni meıramhanaǵa shaqyrdy. Men onyń oıynda ne bar ekenin sezip júrgen edim. Keshki astan keıin ol meni edeni raýshan japyraqtarymen kómkerilgen jeke zalǵa apardy. Romantıkalyq mýzyka oınap turdy. Terezeden túngi Almatynyń keremet kórinisi de baýrap áketti. Men túk túsinbegen adamnyń keıpin tanyttym. Ol bolsa saýsaǵyma saqına taǵyp, oǵan turmysqa shyǵýymdy surady. Men oǵan taǵy bir saǵattaı jaýap qaıtarmaı qınap koıdym. Aqyry shydamaı kelisimimdi berdim.

Kúıeýiniń ákesimen alǵash tanysýy týraly

Ekeýi gólften prezıdenttik kýbok kezinde tanysty. Dımash burynnan gólfpen áýestenetin. Ózi sonda barmaqshy edi. İs-shara aldyndaǵy keshte oǵan bireý habarlasyp, “osyndaı jerge kel… Prezıdentpen kezdesesiń” degen eken. Ol qatty alańdady. Alaıda kezdesý sátti ótip, úıine baqytty oraldy.