Keshe Aqtóbede Qobda tas jolynda kólik qaǵyp qaıtys bolǵan toǵyzynshy synyp oqýshysyn jerledi dep jazady Qamshy.kz aqparat agenttigi Timeskz.kz saıtynyń deregine súıenip.

24 naýryzda úsh synyptas baseınge barady. Aqtóbe qalasynyń Ońtústik batysynda turatyn bozbalalar №10 orta mekteptiń 9-synybynda oqıdy. Baseınnen úılerine keshki 20:00-de qaıtady.

Balalar jaıaý júrginshiler jolymen ótip bara jatqanda eki balany kólik qaǵyp ketedi. Al biri ótip úlgergen. Nurjan Jazyqov oqıǵa ornynda mert bolyp, ekinshi bala jansaqtaý bólimine jetkizilgen.

№10 orta mektep belsendi oqshynyń qazasyna qaıǵyryp otyr.

«Biz mekteptiń eń úzdik oqýshysynan aıyryldyq. Nurjan belsendi edi. Sovet Odaǵynyń batyry Qojabaı Jazyqovtyń urpaǵy. Al reanımasıada jatqan oqýshymyz úshin bárimiz duǵa jasap júrmiz, aýrýhanaǵa ekinshi márte baryp keldik», - dedi mektep dırektory.

Polısıa departamenti kámeletke tolmaǵan balanyń qaıtys bolǵanyn rastady.

«24 naýryzda Qobda jolynda "Opel-Vektra" avtokóliginiń júrgizýshisi Edige batyr dańǵylymen qozǵalyp kele jatyp, rettelmeıtin jaıaý júrginshiler jolynda  kámeletke tolmaǵan eki  jasóspirimdi qaǵyp ketti. Jol-kólik oqıǵasy saldarynan bir bala oqıǵa bolǵan jerde qaıtys boldy, ekinshisi oblystyq balalar aýrýhanasynyń jansaqtaý bólimine jetkizildi. Sot-medısınalyq jáne avtotehnıkalyq saraptamalar taǵaıyndaldy. 20 jastaǵy kólik júrgizýshisi medısınalyq saraptamanyń qorytyndysyna sáıkes saý bolǵan. Júrgizýshi ýaqytsha ustaý ızolátoryna qamaldy. Sotaldy tergeý bastaldy», - delingen departament taratqan aqparatta.

Polısıa deregine súıensek, jyl bastalǵaly oblysta balalardyń qatysýymen 30 jol apaty boldy, 27 bala túrli jaraqat aldy.

Usynǵan: Gúlim Jaqan