Búgin oblys ákimi Amandyq Batalov 8 Naýryz – Halyqaralyq áıelder merekesine oraı oblystaǵy birqatar ardager analardy úılerine baryp, arnaıy quttyqtap qaıtty. Aldymen oblys basshysy eńbek ardageri, «Qurmet belgisi» ordeniniń ıegeri Anna Shevelevanyń shańyraǵynda boldy.
Amandyq Batalov 98 jastaǵy keıýanany merekemen quttyqtap, áńgimelesti. Burynǵy jáne búgingi ómiri týraly qysqasha baıandap bergen áje osy elde týyp, er jetip, osy kúnge jetkenine rıza ekenin aıtty.
«Burynǵy Andreevka aýylynda týdym. Qazaqstan - óz Otanym. Biz soǵysty da, ashtyqty da, aýyrtpalyqty da basymyzdan ótkizdik. 1955 jyldan beri Taldyqorǵan qalasynda turamyn. Elimizdiń, sonyń ishinde Taldyqorǵannyń burynǵy jáne qazirgi kezdegi keıpin ishteı salystyramyn, kún sanap ósip kele jatqanyn kúnde jańalyqtardan kórip, gazetterden oqyp otyramyn. Osy kúndi kórgenime baqyttymyn. Balalarym ósip-óndi, elge qyzmet etetin jaqsy azamattar bolyp erjetti, shúkir. Osyndaı merekelik shaqta quttyqtap kelgenderińizge shyn júrekten rızamyn», - dedi Anna Sheveleva.
Oblys ákimi óz kezeginde ájeıge syı-sıapat tapsyryp, zor densaýlyq tiledi jáne 100-ge kelýine tilektestik bildirip, sol ǵasyrlyq qýanyshynda arnaıy quttyqtap keleýge ýáde berdi.
Kelesi kezekte óńir basshysy soǵys ardageri, İ dárejeli Uly Otan soǵysy ordeniniń ıegeri Altynaı Esbolatty quttyqtady. «Soǵystyń qıynshylyǵyn bastan keshire júrip, jeńistiń jarqyn kúnderine jettik. Búgingi jastar, keler urpaq osy beıbit zamannyń, barymyzdyń baǵasyn baǵasyn bilse eken. El basqaryp júrgen azamattar aman bolyp, halyqty jaqsy kúnderge jetkize bersin! Ananyń aq tileýi osy!» - deı kele, Altynaı apa batasyn berdi.
Oblys basshysy Amandyq Batalov 96 jastaǵy ájeniń izgi nıetine alǵysyn bildirip, merekelik syılyǵyn usyndy, aýyrmaı, tyń, sergek qalyppen uzaq jasaýyna tilektestigin bildirdi. Ájeıdiń qal-jaǵdaıyn, densaýlyǵyn syrttaı surap bilip turatynyn, al búgin quttyqtaýǵa arnaıy kelgenin aıtty. Sonymen qatar qala ákimdigine jáne tıisti basqarmaǵa soǵys ardageriniń dárigerge qaralýy kezinde kólik tasymaly jaǵynan kómektesip turýdy tapsyrdy.
