Úıimde qus jastyqqa jantaıyp, aýzym bolsa, ańqaıyp, teledıdar kórip otyrǵanmyn, «Qashan sháı daıyn bolady?» dep ólip otyrǵanmyn, bir kezde áıelim:
–Esik aldyna nópir halyq jınalypty! Seni shaqyryp tur! –degeni. Esik aldyna esineı shyqqanym sol, on shaqty jigit meni kóterip aldy da, qara súlikteı lımýzınniń ishine laqtyra saldy. Sodan, zymyrap otyryp, Aqordaǵa keldik. Jańaǵy jigitter meni dyryldata súırep ákeldi de, prezıdent taǵyna yńq etkize otyrǵyza saldy.
–Bul ne? –dep suradym men.
–Siz búginnen bastap prezıdentsiz. Halyq sizdi qalaıdy, –dedi biri.
–Al, jaraıdy. Nege men prezıdentpin? Joq. Bolmaımyn! Prezıdent bolsam, jaǵympazdar janyma jınalyp, ómir–baqı ońbaımyn! –dedim men.
–Bolasyz! Halyq sizdi qalaıdy.
–Jaraıdy. Jasym toqsanda ǵoı? Tońqaıyp qalsam she?
–Qyryq jyl qyńq demeısiz!
–Oıbaı–aý, 130 jylǵa deıin kim bar, kim joq?
–Ólýge ruqsat joq!
Amal qanekı, qazirgi Toqaevtan keıin prezıdent boldym! Ózimshe, jaǵympazdardy janyma jolatpaımyn dep ant berdim. Sol kúni keshtetip, úıime kelsem, esik aldynda bireý qolyn sozyp tur. «Amandasqaly turǵan shyǵar?» dep oılap, janyna kelsem, ózimniń eskertkishim! Qolynan súıip, ishke kirdim. Áıelim aıtady: «Jańa ǵana jaǵympazdaryń qoıyp ketti, dyryldatyp, esik aldyn oıyp ketti...» deıdi. Sál shirene bastadym. Kóńil toq, júregim shoq. Erteńine meni quttyqtaýshylar kóshege jınalypty! Gúl shoqtaryn laqtyrǵanda, jalp etip, qulap qaldym. Taýdaı bolyp úıilgen gúl arasynan basymdy qyltıta qarap edim, bireý kelip shashymdy tarady, ekinshisi ústimdi gúl japyraqtarynan tazalaı bastady, úshinshisi týflıimdi sabyndap jýa ketti. Shirene tústim. Belim qaqıdy da qaldy. Sóıleýge erinemin. Prezıdent bolý rahat eken ǵoı? Jer qazbaıdy, shahtaǵa túspeıdi, mal baqpaıdy. Kún uzaq kabınetimde otyryp alyp, klastastarymmen vasap arqyly hat jazysýmen boldym. Oqta–tekte, teledıdardan málimdeme jasap qoıamyn: «Qazaqstan qatyndary! Davaı, týa berińder! 21 myń járdemaqyǵa elý tıyn qosamyn!» deımin. Dep jatyp, aldyma kelgen torttan jep jatyp, oıanyp kettim! Jańaǵynyń bári túsim eken! Sonyń ózinde, kereýetten shirenip tústim ǵoı! Jo–joq, prezıdent bolmaımyn! Nege deısizder me? Aılyǵy az eken...

Muhtar Sherim, satırık