Ortalyq jumysy 5-15 jas aralyǵyndaǵy balalardyń shyǵarmashylyq qabiletterin, ınklúzıvti bilim berý men motorıkasyn damytýǵa baǵyttalǵan, dep habarlady Atyraý oblystyq Óńirlik komýnıkasıalar qyzmeti Qamshy.kz aqparat agenttigine.
«Venera» ınklúzıvti shyǵarmashylyq sheberhanasy aýtızm, Daýn sındromy, sal aýrýy sekildi damýynda erekshelikteri bar balalarmen jumys isteıdi, jańa nysanda ata-analarǵa psıhologıalyq kómek kórsetý men qoldaý sharalary da qamtylǵan.
– Ortalyq 25 adamǵa arnalǵan, munda balalarmen logoped, art-terapıa, logorıtmıka mamandary aınalysady. Sensorlyq-dınamıkalyq ıntegrasıa zaly, dene shynyqtyrý, beıimdelý zaly bar. Ata-analardy qoldaýǵa baǵyttalǵan sharalar da uıymdastyrylady. Beıindik mamandardan bólek AVA-terapıa kabınetteri jumys isteıdi. AVA-terapıanyń basty maqsaty – balanyń jeke qabiletterin negizge ala otyryp, minez-qulyq tehnologıasy men áser etý ádisi arqyly jańa daǵdy qalyptastyrýǵa, qorshaǵan ortany óz erkimen meńgerýine múmkindik jasaý,- deıdi ortalyq basshysy, erekshe balanyń anasy Gúlbaram Ermuqanova. –Ortalyq jumysynyń bastalýyna demeýshiler kómek jasady, memleket tarapynan ǵımarat berildi.
Ortalyqtyń ashylý saltanatyna Atyraý oblysynyń ákimi Nurlan Noǵaev qatysyp, atqarylyp jatqan sharalardyń mańyzdylyǵyn atap ótti. Jergilikti atqarýshy organdar erekshe balalardyń problemalyq máselelerin sheshý úshin barlyq jaǵdaı jasaýǵa daıyn. Bul - memlekettiń bolashaq urpaqqa degen qamqorlyǵy, balalardy áleýmettik beıimdeýge qoldaý kórsetý.
– Qazirgi qoǵamda múmkindikteri shekteýli balalardyń áleýmettik damýy ózekti máselelerdiń biri. Osy ortalyqtyń ashylýyn kópten kúttik. Balalar men ata-analardyń jaǵdaılary barshańyzǵa belgili. Erekshe balalardy áleýmettendirý úshin ne isteý kerek? Biz óz tarapymyzdan osyndaı ortalyqtardy qurýǵa qajet jaǵdaıdyń bárin jasaýǵa daıynbyz. Oblys aýdandarynda da osyndaı ortalyqtar ashý máselesi kún tártibinde tur. Osy sátti paıdalanyp, ortalyqtyń ashylýyna kómek qolyn sozǵan azamattardyń, demeýshiler men eriktilerdiń bárine, basqanyń taǵdyryna nemquraıly qaraı almaıtyn abzal jandarǵa alǵys aıtamyn,-dedi Nurlan Noǵaev.
Ortalyq jumysymen tanysqan aımaq basshysy áleýmettik máselelerdi sheshýge qoǵamdy, qoǵamdyq uıymdar men bıznes-qaýymdastyqty belsendi tartý kerektigin atap ótti. Memlekettik áleýmettik tapsyrystardyń da mańyzy zor. Azamattyq qoǵam men memlekettik ózara baılanysy kóptegen máselelerdiń sheshimin tabýyna yqpal etedi.
