Qazaqstannyń tuńǵysh prezıdenti – Elbasy Nursultan Nazarbaev týǵan jeri - Almaty oblysy Shamalǵan aýylynyń turǵyndarymen júzdesti, dep habarlaıdy Qamshy.kz aqparat agenttigi Aqordaǵa silteme jasap.
Qazaqstannyń tuńǵysh prezıdenti júrgizilip jatqan saıasattyń arqasynda elimizdiń halyqaralyq arenada moıyndalǵanyn atap ótti.
"Biz úlken jumys atqardyq. Buryn eshkimge belgili bolmaǵan Qazaqstan búgin búkil álemge tanyldy. Qazaqstandyqtar túrli elderge baryp, dúnıe júziniń eń úzdik oqý oryndarynda bilim alý múmkindigine ıe boldy", – dedi Nursultan Nazarbaev.
Sondaı-aq, Elbasy aldaǵy qyzmeti jónindegi josparlaryna toqtaldy.
"Men Elbasy retinde strategıalyq máselelerge kóńil bóletin bolamyn. Qasym-Jomart Toqaev meniń artqan úmitimdi aqtaıdy dep senemin", – dedi Qazaqstannyń Tuńǵysh Prezıdenti.
Nursultan Nazarbaev elimizdi jańǵyrtý jóninde qabyldanyp jatqan sharalar, eń aldymen, jastardy qoldaýǵa jáne olardyń damýyna baǵyttalǵanyn atap ótti.
"Men Qazaqstannyń bolashaǵy jarqyn bolatynyna senemin. Ol úshin barlyq jaǵdaı jasalǵan. Kim bıznes ashqysy kelse, oǵan nesıe beriledi. Mamandyǵy joq bolsa, memleket oǵan jańa kásiptik bilim beredi. Másele jumystyń joǵynda emes, mamandyqtyń bolmaýynda. Sonymen qatar, biz aýyldardy damytý úshin kóptegen baǵdarlamalardy júzege asyryp jatyrmyz", – dep túıindedi Elbasy.
Sondaı-aq, Nursultan Nazarbaev bıyl elimizde teńdesi joq áleýmettik sharalar qolǵa alynyp otyrǵanyn atap ótti. Respýblıkada azamattardyń turmys sapasyn arttyrý úshin túrli baǵdarlamalar iske asyrylýda. Sonymen birge, Qazaqstannyń Tuńǵysh Prezıdenti qoǵamda paternalıstik túsinikke jol bermeýdiń mańyzdylyǵyna basa nazar aýdardy.
"Kez kelgen er adamnyń ar-namysy bolýǵa tıis. Bala tárbıesi, eń aldymen, ata-ananyń jaýapkershiligi. Al memleket ata-analardy jumyspen qamtyp, balalaryn asyraýyna jaǵdaı jasaýy kerek", – dedi Nazarbaev.
Sońynda Elbasy kezdesýge qatysýshylarǵa tabys tilep, olardyń jańa belesterdi baǵyndyrýyna nıettestik bildirdi, sondaı-aq barlyǵyn Qazaqstannyń ıgiligi úshin eńbek etýge shaqyrdy.
Usynǵan: Nazerke Labıhan
