Parlament senatynyń tóraǵasy Darıǵa Nazarbaeva Qytaı Halyq Respýblıkasynyń elshisin qabyldady dep habarlaıdy Qamshy.kz aqparat agenttigi total.kz saıtyna silteme jasap.

Senat spıkeri Qytaımen jan-jaqty strategıalyq seriktestik ornatýdyń mańyzy joǵary ekenin atap ótti.

"Qazaqstan Elbasy Nursultan Nazarbaev pen QHR tóraǵasy Sı Szınpınniń joǵary deńgeıdegi dostyq, tatý kórshilik jáne ózara túsinistik negizindegi kelisimderin júzege asyrýǵa nıetti. Strategıalyq jan-jaqty seriktestik negizindegi qarym-qatynasty nyǵaıtý baǵytyn ustanamyz", - dedi Darıǵa Nazarbaeva.

Chjan Sáo QHR Halyq ókilderi búkilqytaılyq jınalysy turaqty komıtetiniń tóraǵasy Lı Chjanshýdyń Darıǵa Nazarbaevaǵa senat tóraǵasy qyzmetine saılanýymen quttyqtaýyn jetkizdi jáne ári qaraı tabysty jumys isteýine tilektestigin bildirdi.

"Biz sizdiń parlamentaralyq baılanystardy damytýǵa jáne Qytaıdyń "Bir beldeý, bir jol" bastamasyn qoldaýǵa qosqan jeke úlesińizdi joǵary baǵalaımyz", - dedi ol.

Senat basshysy eki el arasyndaǵy jastar yntymaqtastyǵyn belsendi damytý, atap aıtqanda, stýdentterdiń almasyp oqýyn jáne bilim granttaryn berýdi jolǵa qoıý qajettigin atap ótti.

Darıǵa Nazarbaeva Shyńjań-uıǵyr avtonomıalyq aýdanyndaǵy qazaqtar taqyrybyn qozǵaı kelip, QHR-daǵy etnıkalyq qazaqtar Qazaqstan men Qytaı arasyndaǵy qarym-qatynasta "dostyq kópiri" ekenin atap ótti. Taraptar osy salada týyndaıtyn máselelerdi ózara aqyldasyp, syndarly túrde sheshýge ýaǵdalasty. Kezdesý barysynda senat tóraǵasy Qazaqstan azamattary úshin týrısik jáne jeke vıza berýdi jańǵyrtý máselesin kóterdi.

Usynǵan: Maqpal Sembaı