Qasym-Jomart Toqaev jýrnalıser aldynda sóılegen sózinde Qazaqstan Respýblıkasynyń prezıdenti retinde Reseı Federasıasyna jasaǵan alǵashqy saparynyń sımvoldyq mánin atap ótip, eki el arasyndaǵy qarym-qatynastardyń erekshe sıpatyn aıtty dep jazady Qamshy.kz aqparat agenttigi Aqordanyń deregin negizge ala otyryp.
– Máskeýge resmı saparmen kelýge shaqyrǵan Reseı Federasıasynyń Prezıdenti Vladımır Pýtınge, sondaı-aq qonaqjaılyq kórsetip, jyly qabyldaǵany úshin reseılik dostarymyzǵa rızashylyq bildiremin. Bul sapar eki taraptyń da odaqtastyqty odan ári damytyp, Qazaqstan men Reseı halyqtarynyń dostyq baılanystaryn nyǵaıtýǵa umtylatynyn kórsetti, – dedi memleket basshysy.
Qasym-Jomart Toqaev qatysýshylarǵa Qazaqstannyń Tuńǵysh prezıdenti – Elbasy Nursultan Nazarbaevtyń memleket basshysy ókilettigin toqtatý týraly sheshimi jóninde aıtty jáne bul qadam Qazaqstannyń keleshegi úshin jasalǵan saıası danalyq pen úlken jaýapkershiliktiń jarqyn úlgisi bolyp tabylatynyn erekshe atap ótti.
– Bul tarıhı oqıǵa álemdik qoǵamdastyqtyń bizdiń elimizge zor qurmetpen qaraýyna túrtki boldy. Búginde Nursultan Nazarbaev barsha Qazaqstan halqynyń ystyq yqylasyna bólenip, qoldaýyna ıe bolyp otyr. Ol Elbasy mártebesinde Qaýipsizdik Keńesiniń jáne Nur Otan basqarýshy partıasynyń tóraǵasy laýazymyndaǵy óziniń aýqymdy qyzmetin atqara beredi, – dedi Qazaqstan prezıdenti.
Memleket basshysy óziniń Prezıdent retindegi qyzmeti Qazaqstan men Reseı arasyndaǵy yntymaqtastyqtyń «altyn ǵasyrynda» bastalǵanyn atap ótip, Nur-Sultan men Máskeýdiń jan-jaqty dıalogyn nyǵaıtý jónindegi strategıalyq baǵdardy jalǵastyrýǵa jáne buǵan deıingi qol jetkizilgen ýaǵdalastyqtardyń sabaqtastyǵyn qamtamasyz etýge zor nıettestik bildiretinin aıtty.
"Men Reseı-Qazaqstan yntymaqtastyǵynyń altyn ǵasyrynda prezıdent laýazymyna kiristim.Meniń alǵashqy resmı saparymnyń tereń sımvoldyq máni bar, ol bizdiń elderimizdiń qarym-qatynasy erekshe mártebege ıe ekenin bildiredi",- dedi Toqaev.
Usynǵan: Ásel Bolatqyzy
