Bul týraly «Nur Otan» partıasy Tóraǵasynyń Birinshi orynbasary Aqmola oblysyna jasaǵan saparynda aıtty.

Sapar barysynda ol Elbasynyń «Nur Otan» partıasynyńkezekti XVIII sezinde anyqtap bergen basymdyqtarynyń oblysta júzege asyrylý barysymen tanysty. Soǵan oraı ol «Halyqqa kómek» jobasy aıasynda qolǵa alynǵan Biryńǵaı áleýmettik tereze júıesiniń qyzmetine nazar aýdardy. Atalǵan júıeniń iske qosylǵanyna kóp ýaqyt óte qoımasa da elimiz boıynsha oń nátıjesin berýde. Sonyń ishinde Aqmola oblysyn erekshe atap ótken jón. Óıtkeni óńirde áleýmettik tereze arqyly 431 ótinish kelip túsip, onyń 43 paıyzy dereý oń sheshimin tapqan. Al elimiz boıynsha 2400-den astam ótinish túsip, onyń 40 paıyzy oń sheshilgen.

Sondaı sheshimderdiń biri Máýlen Áshimbaev pen oblys ákimi Ermek Marjyqpaevtyń qatysýymen oryn aldy. Naqty aıtqanda, qyzynyń oqý aqysy úshin kómek suraı kelgen kóp balaly ana Úmitjan Qobylovaǵa qajetti somada qarjylaı qoldaý kórsetildi. Sondaı-aq onyń páter jaldap turatyny eskerilip, baspana máselesi de qaralyp, oblys basshylyǵy tarapynan zań sheńberinde tıisti jumystar júrgiziletin boldy.

– «Halyqqa kómek» tikeleı Elbasynyń tapsyrmasymen qolǵa alynǵan joba. Sondyqtan azamattardyń ótinishterin aıaqsyz qaldyrmaı, belsendi jumys isteýimiz kerek. Óıtkeni halyqty alańdatqan máselelerdi oń sheship, jedel kómekkórsetý – bizdiń basty mindetimiz, – dedi Máýlen Áshimbaev.

Partıa Tóraǵasy anyqtap bergen mańyzdy basymdyqtardyń biri «Baqytty otbasy» jobasy. Bul bastama tikeleı kóp balaly jáne áleýmettik az qamtylǵan otbasylarǵa júıeli qoldaý kórsetýge baǵyttalǵan. Osy joba aıasynda Máýlen Áshimbaev Kókshetaý qalasyndaǵy kóp balaly Qaqjanovtar otbasyna arnaıy at basyn burdy. Buǵan deıin bul otbasy eki bólmeli páterleriniń qalǵan somasyn ótep, tolyǵymen satyp alý úshin partıadan qoldaý suraǵan bolatyn. Partıalyq jobanyń arqasynda bul ótinishteri oryndalyp, Qaqjanovtar otbasy ózderiniń jeke baspanalaryna qol jetkizdi.

Sonymen qatar Aqmola oblysyna sapary barysynda «Nur Otan» partıasy Tóraǵasynyń Birinshi orynbasary Kókshetaý qalasyndaǵy sý basqan «Prıvokzalnyı» shaǵyn aýdanynyń turǵyndarymen kezdesti. Atalǵan máselege baılanysty Máýlen Áshimbaev partıanyń jergilikti fılıalyna tótenshe jaǵdaımen kúres jumystaryn baqylaýda ustap, zardap shekken ár azamattyń memleket tarapynan beriletin mindetti kómekti alýyn qamtamasyz etýdi tapsyrdy.

Sondaı-aq ol partıanyń aımaqtyq aktıvimen kezdesip, aldaǵy jumystyń baǵyt-baǵdaryn pysyqtady.