Kóp balaly analarǵa beriletin járdemaqyǵa qatysty aýyl-aımaqta dúrbeleń bolyp jatyr eken. Eger kóp balaly otbasy zeınetaqy alatyn ata-analarymen, enelerimen turatyn bolsa jáne olardyń maldary bolsa járdemaqy berilmeıdi eken.  Bári esepteledi. Memleketten taǵaıyndalǵan kómekti alý úshin Kóp balaly jas otbasylar ata-eneden bólek turýy tıis. 

Paradoks!  Qazaqstan qyzyqstanǵa aınalyp barady.
Aýyl qarttary azǵantaı ǵana zeınetaqy alady. Bul olardyń uzaq jylǵy eńbekteriniń óteýi. Qanshama jyl memleketke quıǵan salyqtary.

Bir úıde zeınetkerlermen birge tursa nege járdemaqy berilmeıdi?  Zeınetkerler óz aqshalaryn ózderine jumsaýlary tıis qoı. Bizdiń qarıalar sheteldik kári adamdar syndy álem aralamaıdy. Óıtkeni, oǵan zeınetaqy jetpeıdi.  Kóp balaly otbasylar úlkendermen birge turyp, sol kisilerge qamqor bolyp otyr.

Meniń estýimshe, kóptegen otbasylar kári ata-anasyn jalǵyz qaldyryp, járdemaqy alý úshin bólek shyǵýda.  Jalpy, zań boıynsha járdemaqy taǵaıyndaýda ne dep jazylǵan?  Kim biledi?  Men bundaı jarylqaýdy túsine almadym. Kim kimdi jyndy qylyp otyr? 

Jalpy, járdemaqy, zeınetaqy, jalaqy bul bizdiń salyǵymyz esebinen tólenetin aqsha.  Qarapaıym halyqqa bılik basyndaǵylar qaltalarynan shyǵaryp, qarjy berip otyrǵan joq.  Kóp balaly otbasylarǵa járdemaqy berý úshin zeınetaqyny, maldy sanaýdy kim shyǵardy?  Bul qaı jerde jazylǵan?  Álde jergilikti bılik oıyna kelgenin istep otyr ma?

Oılana kele Sizderdiń pikirlerińizdi bilgim keldi. 

Janar Baısemizovanyń Instagram paraqshasynan