10 sáýirde Atyraý oblysynyń ákimi Nurlan Noǵaevtyń tóraǵalyǵymen oblys ákimdigi janyndaǵy quqyq buzýshylyqtyń aldyn alý jónindegi vedomstvoaralyq komısıanyń májilisi ótti.
Talqylanǵan eń basty másele – óńir turǵyndarynyń qaýipsizdigine qatysty ahýal. Atyraý oblysy Qoǵamdyq keńesiniń tóraǵasy Murat Óteshev habarlaǵandaı, jyl saıyn oblysta adamdardyń joǵalýy jóninde 50-60 –qa deıin júginýler tirkeledi eken.
- Statısıka boıynsha, ótken jyly Atyraýda jáne Jylyoı, Qurmanǵazy, Inder aýdandaryna adamdardyń joǵalýy tirkelgen. Júginýshilerdiń basym kópshiligi – uzaq merzimdi issaparlarǵa shyǵatyndardyń, maýsymdyq jumystarmen qamtylǵandardyń týysqandary,-deıdi Murat Óteshev. – Jasóspirimderdiń problemasy tolǵandyrady. Úıden ketip qalýdyń negizgi sebebi – otbasylyq problemalar. Balanyń suranysyn eskermeý - kóbinese úıden ketip qalýǵa sebep bolady. Bul ata-anamen ózara túsinistik bolmaýynan týyndaıdy. Jasóspirimderdiń úıden ketip qalýyna áleýmettik jelilerdiń de áseri bar. Osynda olar vırtýaldy dostarymen tanysyp, biri - birin izdep, úıden ketip qalady.
Keıbireýler oılaǵandaı, joǵalyp ketýdiń kópshiligi krımınaldy jaǵdaılarmen nemese qaıǵyly oqıǵalarmen emes, otbasyndaǵy alaýyzdyqpen jáne keleńsiz jaǵdaılarmen túsindiriledi. Atyraý oblysy Polısıa departamentiniń bastyǵy Aıan Dúısembaev búgingi kúni 6 adam joǵalyp ketti dep tirkelip, olarǵa izdeý salynyp jatqanyn atap ótti.
- Bizge joǵalyp ketý máselesimen jyl saıyn 50-ge deıin júginýshiler bolady. Biraq, biz olardy taýyp jatyrmyz. Búginde 6 adam joǵalyp ketti dep esepteledi, - degen túsinik berdi oblystyq polısıanyń bastyǵy.
Komısıa músheleri jas býyndy tárbıeleý, qıyn jaǵdaıǵa ushyraǵan otbasylaryna psıhologıalyq kómek kórsetý, turmystaǵy zorlyq-zombylyq sıaqty problemalardy, áıelderdi qorǵaý jáne otbasy ıeleriniń balalarynyń bolashaǵy úshin jaýapkershiligi máselelerin talqylady.
Qarıalar úıinde turyp jatqan qart adamdardy beıimdeý problemasy – egjeı-tegjeıli zertteýdi qajet etetin taqyryp. Balalary ózderiniń ata-analaryn osy mekemege berýiniń sebebi ne ? Búgingi kúni Atyraýdaǵy qarıalar úıinde 104 qart adam turyp jatyr. Kópshiliginiń otbasylary bar.
Atyraý oblysynyń ákimi Nurlan Noǵaev bul áleýmettik problemany birlesip sheshý qajettigin atap ótti. Memleket qarttardy qamqorsyz qaldyrmaıdy. Biraq, ata-analary úshin balalary da jaýapty bolýy tıis.
-Eń bastysy, adamdardyń, qoǵamnyń sanasyna osy problemalardy jetkizý kerek. Bul – bizdiń dástúrimizde joq, qoǵamymyzda eshqashan bolmaǵan nárse. Bul sizderdi ósirip, baryn syılaǵan ata-analaryńyz. Sondyqtan, olarǵa, aldymen sizder jaýapty bolasyzdar,– dedi Nurlan Noǵaev.
Oblys basshysy jumyspen qamtýdy úılestirý jáne áleýmetti baǵdarlamalar basqarmasynyń basshysy Serik Hamıdollaǵa ashyq esik kúnderin ótkizýdi, osyndaı adamdardyń balalary men týysqandaryn shaqyryp, túsinik jumystaryn júrgizýdi tapsyrdy. Qarıalar úıinde turyp jatqandardyń keıbireýiniń balalary tabysty ómir súrýde, olardyń atyna jyljymaıyn múlikter de tirkelgen. Biraq, aınalyp kelgende, memleketten basqa qamqorshysy bolmaı otyr.
- Sońǵy jyldary oblys ákimdiginiń qarjylyq qoldaýynyń arqasynda polısıanyń materıaldyq-tehnıkalyq bazasy jaqsardy. Sonyń ishinde, beınekameralardyń ornatylýy azamattardyń qaýipsizdigi máselesin sheshýge múmkindik beredi. Búgingi kúnge quqyq buzýshylarǵa 1,5 mlrd. teńge aıyppul salyndy. Onyń ishinde, 1 mlrd 134 mln. teńge jergilikti búdjetke tústi. Quqyq qorǵaý organdary qyzmetin atqarýy úshin 34 polısıa beketiniń qurylysy josparlanǵan. Olardyń 22-i salyndy. Tutastaı alǵanda, barlyq polısıa ýchaskeleri qajetti jabdyqpen jaraqtalǵan. 98 avtokólik alyndy ,– dedi A.Qaıyrov.
Halyqtyń qaýipsizdigin qamtamasyz etý úshin quqyq qorǵaý organdaryn qarjylaı qoldaýdyń mańyzdylyǵyn oblys ákimi atap ótti.
Júzdegen adam qazaǵa ushyrap jatqan joldardaǵy qaýipsizdik bizdiń sanamyzǵa da táýeldi. Júrgizýshilerdiń kólik aıdaý mádenıeti men kásibı mashyqtary máz emes.
- Jolaýshylar tasymaldaýda 90 jańa avtobýs qyzmet kórsetýde, balansqa alynǵasyn taǵy 30-y kóshelerge shyǵady. Taǵy 100 avtobýs satyp alý josparymyzda bar. Bunyń barlyǵy jolaýshy tasymalynyń sapasyn jaqsartý úshin jasalyp jatyr. Bul – qala turǵyndary kóterip júrgen másele. Bul jerde týyndaıtyn problema– kólikti júrgizý qaýipsizdigi. Jolaýshylardy kóp jınap alamyn dep júrgizýshiler jarysqa túsip jatady. Buny tasymaldaýshy kásiporyndardyń basshylary da, jol polısıasy qyzmetkerleri de qadaǵalaýy tıis, - dep atap ótti oblys ákimi.
Jolaýshylar kóliginde jyldamdyqtan asyp ketý trekerlerin ornatý jóninde óńir basshysy ókiletti organdarǵa tapsyrma berdi.
- Biz qazir tasymaldaýshy kompanıalardy sýbsıdıalaýdy josparlap otyrmyz, buny baqylaýǵa alý qajet. Eń joǵary jyldamdyq saǵatyna 60 shaqyrymnan aspaıtyn bolyp belgilensin. Biz tasymaldaýshylardy sapaly qyzmet kórsetip, qaýipsizdikti saqtaýǵa mindetteımiz, - dep basyp aıtty Nurlan Noǵaev.
Qoǵamdyq qaýipsizdikke qatysty barlyq máselelerdi vedomstvoaralyq komısıanyń músheleri udaıy baqylaýda ustaıtyn bolady.