Bul týraly partıa Tóraǵasynyń Birinshi orynbasary Máýlen Áshimbaev partıanyń Ortalyq apparatynda ótken jıynda aıtty.

– Elimizdegi jetekshi saıası partıa retinde «Nur Otan» prezıdent saılaýyna belsendi túrde qatysady. Partıa Tóraǵasynyń tapsyrmasyna sáıkes partıamyz saılaýǵa qatysý úshin óz kandıdatyn usynady. Soǵan baılanysty búgin Nursultan Ábishuly Nazarbaev 2019 jyldyń 23 sáýirinde partıanyń kezekten tys XIX sezin shaqyrý týraly Qaýlyǵa qol qoıdy. Sol sıeze «Nur Otan» atynan saılaýǵa qatysatyn kandıdattyń esimi belgili bolady, – dedi Máýlen Áshimbaev.

Sondaı-aq ol kezekten tys prezıdent saılaýyn ótkizý týraly sheshimniń óte oryndy ári ýaqytyly qabyldanǵanyn aıtyp, «Nur Otan» partıasynyń atalǵan tarıhı sheshimdi qoldaıtynyn jetkizdi.

– Biz Qazaqstan Prezıdenti Qasym-Jomart Toqaevtyń kezekten tys prezıdent saılaýyn ótkizý týraly sheshimin tolyǵymen qoldaımyz. Bul bıliktiń turaqtylyǵy men eldiń birligin nyǵaıtý úshin qabyldanǵan ýaqytyly ári óte oryndy sheshim. «Nur Otan» partıasy saılaý naýqanyna tas-túıin daıyn. Ol úshin biz ózimizdiń uıymdastyrýshylyq, kadrlyq, saıası jáne aqparattyq áleýetimizdi paıdalanyp, zań aıasynda jumys isteımiz. Saılaý elimizdegi turaqtylyq pen birliktiń odan ári kúsheıýine oń áserin tıgizip, halyqty Elbasynyń saıasaty aıasynda jańa maqsattarǵa jeteleıdi dep senemiz, – dedi Máýlen Áshimbaev.

Jıyn sońynda Máýlen Áshimbaev partıanyń Ortalyq apparaty men barlyq deńgeıdegi fılıaldaryna jáne bastaýysh partıa uıymdaryna aldaǵy saılaý naýqanyna qatysty birqatar naqty tapsyrmalar berdi.