Aqordada Qazaqstan Respýblıkasy Prezıdentiniń janyndaǵy «Rýhanı jańǵyrý» baǵdarlamasyn iske asyrý jónindegi ulttyq komısıa otyrysy ótti, dep habarlaıdy Qamshy.kz aqparat agenttigi

Memleket basshysy Qasym-Jomart Toqaevtyń Jarlyǵymen jańartylǵan Ulttyq komısıa quramyna Qazaqstan Respýblıkasynyń Memlekettik hatshysy Marat Tájın jetekshilik etedi.

Komısıa otyrysynda «Rýhanı jańǵyrý» baǵdarlamasy men Elbasynyń «Uly dalanyń jeti qyry» atty maqalasynyń iske asyrylý qorytyndylary, sonymen qatar jańa jobalardy júzege asyrý josparlary qaraldy. Jıyndy ashqan Memlekettik hatshy Marat Tájın eki jyl ishinde qoǵamdyq jáne tarıhı sanany jańǵyrtýdy maqsat etken aýqymdy jumys atqarylǵanyn atap ótti.

Latyn grafıkasy negizindegi qazaq álipbıi bekitildi. «Týǵan jer» jobasy aıasynda mesenattar qarajatyna 27 mektep, 115 balabaqsha, 479 áleýmettik ınfraqurylym nysany salyndy.

Sonymen qatar, el tarıhynda alǵash ret shet tilderden ekonomıka, áleýmettaný, saıasattaný, psıhologıa jáne ózge de ǵylym salalary boıynsha álemdegi 48 úzdik oqýlyq qazaq tiline aýdarylyp, basyp shyǵaryldy. Eldiń gýmanıtarlyq bilim qory 2019 jyly taǵy 30 kitappen tolyqpaq.

Sondaı-aq BUU-nyń negizgi 6 (aǵylshyn, fransýz, ıspan, arab, qytaı, orys) tilinde Qazaqstan jazýshylary men aqyndarynyń proza jáne poezıa antologıalary baspaǵa ázirlenip, osy jyly jaryq kóretin bolady.

Usynǵan: Ásel Bolatqyzy