Kúni keshe IX Beıjiń Halyqaralyq kınofestıvaliniń (The 9th Beijing International Film Festival) konkýrstyq baǵdarlamasy aıasynda alǵashqy qazaq-qytaı birlesip túsirgen kórkem fılmi - "Kompozıtordyń" kórsetilimi ótti dep habarlaıdy Qamshy.kz aqparat agenttigi "Qazaqfılm" kınostýdıasynyń baspasóz qyzmetine silteme jasap. 

Festıválde kartınany fılm avtorlary men akterleri tanystyrdy. Atap aıtar bolsaq - Sh.Aımanov atyndaǵy "Qazaqfılm" AQ birinshi vıse-prezıdenti Serik Jubandyqov, qoıýshy rejıseri - Sherzat Iakýb, qosalqy rejıseri - Sábıt Qurmanbekov, Baqytjan Baıqadamovtyń rolin somdaǵan akter - Berik Aıtjanov, Sı Sınhaı men onyń jarynyń obrazyn jasaǵan qytaı akterleri  - Hý Chjýn jáne Iýan Chýan.  

Festıvál qonaqtary jáne Qytaıdyń shyǵarmashylyq zıaly qaýymy fılmdi zor yqylaspen qarsy aldy. Máselen, qytaı sýretshisi Tın Hýan fılm týraly jyly lebizin bildirip, kórýge keńes etti.  

Kórkem lenta qytaılyq kompozıtor Sı Sınhaıdyń Sovet odaǵynda, onyń ishinde Almatyǵa evakýasıalanǵan kezi men qazaqtyń kompozıtory Baqytjan Baıqadamovpen dostyǵy týraly baıandaıdy. Fılmdi Sh.Aımanov atyndaǵy "Qazaqfılm" kınostýdıasy jáne qytaılyq "Shineworks Pictures", "China film coproduction corporation" kompanıalary túsirgen.

Bıyl festıválge qatysýǵa 85 elden 775 kınotýyndy úmit bildirgen. Nátıjesinde, festıváldiń Tiantan ("Aspan ǵıbadathanasy") atty bas júldesi úshin túrli elden barlyǵy 15 fılm báıgege túsetin bolady. Olardyń ishinde qytaılyq "Adasqan ǵalam", amerıkandyq "Ben oraldy" (Ben Is Back), ırandyq "Osynda" (Iro, Here), qazaq-qytaı birlesip túsirgen "Kompozıtor" jáne basqa da týyndylar bar. Festıváldiń jeńimpazdary baıqaýdyń jabylý saltanatynda sáýirdiń 20-nda jarıalanatyn bolady.

Tiantan basty baıqaýdan basqa, bıyl festıvál sheńberinde alýan túrli mádenı is sharalar ótedi, atap aıtsaq, taqyryptyq semınarlar, jármeńkeler, kınokarnaval, sondaı-aq "Úndi kınosynyń aptalyǵy", "Bolashaqqa kózqaras", "Kınodaǵy klasıkalyq Beıjiń operasy" syndy baǵdarlamalar men kınokonsertter ótedi. 

Eske salaıyq, Halyqaralyq Pekın kınofestıvali 2011 jyly qurylǵan bolatyn. QHR kınematografıa boıynsha Memlekettik basqarmasynyń bastaýymen ótkiziletin festıváldi Qytaıdyń Medıakorporasıasy men Pekınniń halyq úkimeti uıymdastyryp otyr.

Aıta keteıik, "Kompozıtor" fılminiń óndirisi úkimet deńgeıinde uıymdastyrylǵan bolatyn. 2015 jyly 31 tamyzda Qazaqstan Respýblıkasynyń Tuńǵysh Prezıdenti Nursultan Nazarbaev jáne Qytaı Halyq Respýblıkasynyń Tóraǵasy Sı Szınpınniń qatysýymen ótken mádenı-gýmanıtarlyq yntymaqtastyq týraly kelisimge qol qoıylǵan kezde ýaǵdalastyq etilgen.  

QR Mádenıet jáne sport mınıstrliginiń usynysy boıynsha Sh.Aımanov atyndaǵy "Qazaqfılm" AQ men qytaılyq Shineworks Pictures kompanıasy arasynda atalǵan fılmdi birlese óndirý, qarjylandyrý, jáne paıdalaný jóninde kelisimge otyrǵan.

2017 jyly 8 maýsymda QHR Tóraǵasy Sı Szınpınniń Qazaqstanǵa jasaǵan sapary aıasynda qol qoıylǵan birlesip kınoóndiristi  júrgizý týraly memleketaralyq kelisim negizinde atalǵan kınojoba iske asqan bolatyn. 

Kartınanyń túsirilimderi 2017 jyly ótip, fılmniń biraz bóligi Qazaqstanda júrgen. Sı Sınhaı qysqa ǵumyrynda 500-den astam tamasha áýender jazǵan, sondaı-aq ol 10-ǵa jýyq kınofılmder mýzykasynyń avtory. Almatyda ótkizgen jyldary ol «Ult azattyǵy» sımfonıasyn jazǵan. Azattyq pen otanǵa degen adaldyqty jyrlap, zorlyq-zombylyq pen soǵysqa qarsy baǵyttalǵan Sı Sınhaıdyń shyǵarmalarynan otanǵa degen mahabbatyn ańǵarýǵa bolady.

Usynǵan: Maqpal Sembaı