Aılyǵy tómen búdjettik sala qyzmetkerleriniń jalaqysy 2019 jyldyń 1 maýsymynan bastap ósedi dep habarlaıdy Qamshy.kz aqparat agenttigi.

Qazaqstan prezıdenti Qasym-Jomart Toqaev 2019-2021 jyldarǵa arnalǵan búdjetke ózgerister engizý týraly zańǵa qol qoıdy. Ol bul týraly Twitter paraqshasynda habarlady.

"2019-2021 jyldarǵa arnalǵan respýblıkalyq búdjet týraly" QR zańyna ózgertýler men tolyqtyrýlar engizý týraly" zańǵa qol qoıdym", - dep jazdy memleket basshysy.

Toqaev qujatty ázirlegen úkimetke jáne mańyzdy ózgertýlerdi jyldam qarap, qabyldaǵan parlament depýtattaryna alǵysyn jetkizdi.

Prezıdent bıyl 1 maýsymnan bastap bir mıllıonnan astam qazaqstandyqtyń jalaqysy ósetinin habarlady.

"Endi 1 mıllıonnan astam aılyǵy tómen aýyldyq, aýdandyq, oblystyq deńgeıdegi búdjettik sala qyzmetkerleriniń jalaqysy 2019 jyldyń 1 maýsymynan bastap ósetin bolady", - dep jazdy ol jeke paraqshasynda.

Eske sala ketsek, Qazaqstannyń tuńǵysh prezıdenti - Elbasy Nursultan Nazarbaev 2019 jyldyń 1 shildesinen bastap búdjet salasyndaǵy aılyǵy tómen qyzmetkerlerdiń jalaqysyn 30%-ke, aýdandyq jáne oblystyq deńgeılerde tikeleı halyqpen jumys isteıtin atqarýshy organdardyń tómengi satydaǵy qyzmetkerleriniń jalaqysyn ortasha eseppen 25%-ke ósirýdi tapsyrǵan bolatyn.

Keıin memleket basshysy Qasym-Jomart Toqaev jalaqysy tómen qyzmetkerlerdiń aılyǵyn 1 shildeden emes, 1 maýsymnan bastap kóterý týraly tapsyrma bergen edi. 

Usynǵan: Maqpal Sembaı