Temirjol aýmaǵyn tazalaýǵa shyqqan oqýshylar shette turǵan júk vagonynyń ústine shyqpaqshy bolady. Birinshi bolyp shyqqan bala toqqa túsip qaza tapty dep habarlaıdy Qamshy.kz aqparat agenttigi Sputnik Qazaqstannyń deregine súıenip.
Aqmola oblysy Atbasar aýdanynda úsh oqýshy toqtap turǵan vagonnyń ústine shyǵyp alǵan. Olardyń biri toqqa túsip kóz jumdy, taǵy bireýi aýrýhanaǵa jetkizildi.
Senbilik kezinde bolǵan qaıǵyly jaıt týraly qaza bolǵan balanyń ápkesi aıtyp berdi.
"Meniń baýyrym men Irchenko stansıasy aýmaǵynda bolǵan oqýshylar qazaq orta mektebinde oqıdy. Men de sol mektepte oqyǵam, kezinde temirjol aýmaǵyna senbilikke shyǵatynmyn. Biraq sol kúni qaıǵyly oqıǵa oryn aldy. Ol vagondardyń turǵanyna bir apta bolǵan sekildi. Balalar kim tez minedi dep bástesip, oǵan jarysa shyqqan sıaqty", - deıdi qyz.
Eń birinshi bop vagonǵa qyzdyń 14 jastaǵy inisi mingen. Balalardyń aıtýynsha, ony birden toq soǵyp, sol mezette jan tásilim etipti.
"Balalardyń aıtýynsha, onyń qoly sym temirge tımegen. Qolyn kótergende aýadaǵy joǵary vóltty toq soǵypty. Ekinshi bala jaraqattanǵan, al úshinshisi sekirip túsip úlgergen", - deıdi qyz.
Al synyptasynyń ólimine kýá bolǵan basqa oqýshylar bolsa, áli esterin jıa alar emes.
Qaıtys bolǵan balanyń ápkesiniń sózine súıensek, ol arada turǵan vagondar astanalyq "Astyq Trans" JSHS-ǵa tıesili kórinedi.
"Eger vagondar eldi mekendi aýmaqta, onda da mektepke qarama-qarsy tursa, olar toqtan ajyratylýy kerek bolatyn. Kim jaýapty bul qazaǵa? Kináliler jazasyn alsyn ", - deıdi marqum balanyń týystary.
Atbasar aýdanyny ákimdiginiń qyzmetkerleri bul faktige qatysty tergeý bastalǵanyn jetkizdi.
"Irchenko stansıasy ýaqytsha turaq, ol bizdiń qaramaǵymyzda emes. Vagon ústinde joǵary vóltty toq nege bolǵan, kúzet, jol jóndeıtinder qaıda qaraǵan, balalar emin-erkin ol vagondardyń ústine nege shyǵyp ketken? Bul saýaldardy "Qazaqstan temir joly" nemese ishki ister basqarmasyna joldaǵandaryńyz jón bolar. Qazir bul jaıtqa qatysty qylmystyq is qozǵalyp, tergeý bastalyp ketken. Kináliler óz jazasyn alady dep oılaımyn", - dedi Atbasar aýdanynyń ákimi Amanbek Qaljanov.
Biraq ol istiń qandaı bap boıynsha qozǵalǵanyn naqtylaı almady.
Kólik polısıasy departamentiniń baspasóz qyzmeti habarlaǵandaı, bul faktige qatysty 344-baptyń 2-tarmaǵy, ıaǵnı "Abaısyzda adam ólimine ákelip soqqan temirjol qozǵalysy qaýipsizdiginiń tártibi jáne ony júrgizý erejelerin buzý" boıynsha sotqa deıingi tergeý isi qolǵa alynǵan. QR Qylmystyq kodekstiń 201-babyndaǵy talaptarǵa sáıkes, tergeýdiń mán-jaıyn jarıalaýǵa bolmaıdy.
Al "Qazaqstan temir joly" kompanıasy ázirge jaýap bergen joq.
Usynǵan: Nazerke Labıhan
Pikir qaldyrý