Jambyl oblysynyń aýmaǵynda avtobýs aýdarylǵan kezde zardap shekken keıbir jolaýshynyń jaǵdaıy áli múshkil. Aýrýhanaǵa túsken toǵyz adamnyń úsheýi jansaqtaý bóliminde jatyr.

Bul týraly Qamshy.kz aqparat agenttigi habarlaıdy, Stan.kz portalyna silteme jasap.

Al, qaza tapqan 11 jannyń máıiti týǵandaryna tabystalypty. Marqumdardyń úsheýi Ózbekstan azamaty. Atyshýly Qordaı asýyndaǵy jol apaty qalaı bolǵan? Oǵan kim kináli?

On bir adamnyń ómirin qıǵan jantúrshigerlik jol apaty Qordaı-Almaty tas jolynda bolǵan. Senbi kúni tańǵy bester shamasynda Shymkentten shyqqan eki qabatty avtobýs aldynda soqtyǵysyp turǵan eki kólikke qaıta soqtyǵyspas úshin rólin jol jıegine burypty. Qoǵamdyq kólikti myna temir qorǵandar da qorǵaı almaǵan. Qazir oqıǵa ornynda birde bir kólik bolmaǵanymen jany qınalǵan jandardyń qany jan jaǵynda shashyrap jatyr.

Bir-biriniń ústine qulaǵan jolaýshylar shyrt uıqydan shoshyp oıandyq deıdi. Arasynda áýeli túsim shyǵar dep esh qımylsyz buryshta qatyp qalǵandar da bolǵan. Shyny shaǵylyp, shyńǵyrǵan daýystan bireýdi esitý múmkin emes bolǵanyn aıtady. Jolda adam ba, sómke me qaramaı, jan baǵyp avtobýstan shyqqansha asyǵypty.

- Bilmeımin, uıyqtap jatqanmyn.

- Qaı jerlerińizde jaraqat? Qolyńyz basyńyz?

- Meniń jaraqatymdy ne isteısiz? Kelinshegimnen aıyryldym. Ketińizdershi ana jaqqa.

Áıelimen jolǵa shyǵyp, qapıada aıyrylyp qalǵan azamattyń basy jarylyp, beti jyrtylyp, qoly synǵan. Ózdigimen júrýge murshasy joq. Tildese almadyq, qaıǵydan júregi qan jylap tur.

Al, Kýgashevter áýleti Tashkentten ákesin jerlep qaıtyp kele jatypty. Bir otbasyndaǵy úsheýi de aman bolǵanymen, jaraqattary aýyr. Bári júrgizýshiniń kinási deıdi.

"Bul tek jyldamdyqtan bolyp tur. Eger jaı kele jatqanda, toqtatyp alýǵa bolar edi avtobýsty. Avtobýs tórt-bes ret aýnaǵan. Sýretterin kórgen shyǵarsyńdar. Tóbesi qalmaǵan", - deıdi turǵyn Bahrıddın Kýgashev.

İshi adamǵa lyq toly qoǵamdyq kólikte eki júrgizýshimen qosqanda 40 jolaýshy bolǵan. Onyń 8-i oqıǵa ornynda jan tapsyrsa, úsheýiniń demi aýrýhanada úzilgen. Qaıtys bolǵandardyń kóbi joǵary qabatta jatqandar. Aman qalǵandaryn túrli jaraqattarymen Qordaıdaǵy aýrýhanaǵa jetkizipti. Ózbekstan, Tájikstan jáne óz elimizdiń azamattary.

"Biz Ózbekstannan óz joralarymdy tanımyn. Úsheýi boldy. Basqasyn tanymaımyn", - dedi Ózbekstan azamaty Ómirbek Aıtbaev.

"Men Tájikstannanmyn. Biz úsheý edik. Mende jaqsy. Jaraqat joq", - dedi Volıdjon Dýsaev.

Ábden kameradan qashyp, sóıleýden úzildi-kesildi bas tartqandar avtobýstaǵy jerlesteri jaıynda tolyq aqparat bermedi. Tek Qazaqstanǵa nápáqa izdep kelgenderin aıtty. Al, eki júrgizýshi sap-saý. Esh jerleri jaraqattanbaǵan. Aýrýhanadan polıseıler olardy da apyr-topyr tergeýge áketti. Tildestirmedi. Bári quddy kelisip alǵandaı, kamera kórse, aldy-artyna qaramaı qashýda.

Jol apatynna qaza tapqandardyń máıitteri kúni keshe týǵandaryna tabystalǵan. Marqumdardyń 8-i Qazaqstan, 3-eýi Ózbekstan azamtary eken. Shekaradan ótkizdik deıdi shendiler. Al, aýrýhanada zardap shekken toǵyz adam jatyr, keıbiriniń jaǵdaıy aýyr.

"Onyń úsheýi jansaqtaý bóliminde. Bireýi - Ózbekstan azamaty. Altaýy alty adam ártúrli bólimshelerde. Ekeýi  - Tájikstan azamaty", - dedi oblys ákimi Asqar Myrzahmetov.

Jambyl oblysynyń ákimi Qordaı-Almaty tas jolynda apat bolatyndaı eshqandaı sebep bolmady,  bári júrgizýshilerdiń júgensizdiginen deıdi. Al, oqıǵa ornyn qutqarýshylar typ-tıpyl ǵyp tazalap ketkenimen, ár jerde bir jolaýshylardyń qulaqshyny, maıysqan aıaq kıimderi men júrgizýshiniń vızıtkasyna deıin shyny astynda búktetilip jatyr.