Dımash Qudaıbergen qytaılyq telebaǵdarlamalardyń birine suhbat berdi dep jazady Qamshy.kz aqparat agenttigi. Jas ánshi óziniń talantyn joǵary baǵalaýǵa tıis emestigin, ánshiniń talantyna kórermender baǵa berý kerektigin aıtty.
Suhbat kezinde qytaılyq telejúrgizýshi "Ózińizdiń mýzykalyq talantyńyz baryn qashan túsindińiz?" degen suraq qoıady. Atalmysh suraqqa Dımash bylaı jaýap berdi:
— Men mektep tabaldyryǵyn attaǵan kúnnen bastap mýzykamen aınalysa bastadym. Jaqynda 25-ke tolamyn. Qazir erekshe talantym bar dep maqtana almaımyn. Anaý aıtqandaı daýysym bar dep te aıtpaı-aq qoıaıyn. Halyq óz baǵasyn berer, áıtpese yńǵaısyz. Meniń eń úlken jetistigim — sahnaǵa shyǵyp ózimniń kishigirim, az-maz ónerimmen halyqty qýantý.
— Qandaı mýzyka janryn jaqsy kóresiz?
— Endi mýzyka taqyrybyna kelgende qatyp qalǵan qaǵıda joq. Men ár baǵytty, ár janrdy jaqsy kóremin. Barynsha túrli baǵyttaǵy ánderdi oryndaýǵa tyrysyp júrmin.
— Kishkentaı kezińizde kimdi úlgi tuttyńyz?
— Maıkl Djekson, Selın Dıon, Lýchanno Pavarottı, Andrea Bachellı. Bulardy bólip jara almaımyn.
— Siz qaı qytaılyq ánshilermen birigip jumys istegendi unatasyz?
— Qytaıda ózim súıip tyńdaıtyn ánshiler óte kóp. Mysaly "Leon" toby. Olar meniń dostarym. Kásibı mýzykalyq turǵydan qaraǵanda olardyń deńgeıi óte joǵary. Ár túrli aspapta oınaı alatyndarymen meni baýrap aldy. Sondaı-aq Tıa Reı degen ánshi bar. Qazaqta sen tur men ataıyn dep aıtatyndaı ánshilerdiń biri. Men ǵana emes kórermender de kóz jetkizgen bolar. Terrı Lın esimdi ánshini tek ánshi retinde ǵana emes rýhanı turǵydan óte baı adam dep esepteımin.
— Batys ánderin tyńdaısyz ba?
— Iá árıne tyńdaımyn. Kóptegen ánder unaıdy. Mysaly "Papparasıa" degen án bar.
— Qytaı ánderi men batys ánderiniń ereksheligi nede dep oılaısyz?
— Men amerıkalyq shoýǵa qatystym. Ár eldiń mádenıeti ártúrli ekenin 100 paıyz senimmen aıta alamyn. Eń aldymen mýzykasy da bir-birine uqsamaıdy. Ári kórermenderdiń talǵamy da erekshe. Bir elde oryndaǵan tanymal ániń basqa elde tanymal bola almaıdy. Sebebi talǵamǵa kelmeıdi. Ár eldiń ózindik talǵamy men mádenıeti bar. Mysaly men osy elde (Qytaıda — red.) oryndaǵan alǵashqy avtorlyq ánim "Battle of Memmories" boldy. Bul án saýndtrek boldy jáne birneshe mýzykalyq premıaǵa ıe boldy. Endi bul ándi men basqa elde oryndaıtyn bolsam, keıbir elge unaýy múmkin, al keıbiri tipti mán bermeýi de múmkin.
— "I am singer" baıqaýynan ne ala aldyńyz?
— Bul joba meniń mansabymnyń qalyptasýyna úlken septigin tıgizdi. Mysaly Qytaıdaǵy qanshama kórermender meni ózderi úshin jańalyq retinde ashyp aldy. Sondaı-aq shet memleketterde óz tyńdarmandarym paıda boldy. Bul bir jaǵynan alyp qaraǵanda baq. Sondaı-aq meniń ustazdarym óte keremet kisiler boldy. Ári kishigirim darynymyz da bar shyǵar. Allanyń qalaýymen osyndaı nátıjesin berip jatyr.
— Jaqynda ǵana atyshýly "Bogemskaıa rapsodıa" atty fılmniń premerasy ótti. Atalmysh fılmdi kórdińiz be?
— Men Queen tobynyń burynnan kele jatqan tyńdarmanymyn. Al bul fılmdi kórgen kezde men eki oıly bolyp qaldym. Mýzykant retinde men bul fılmnen Freddı Merkúrıdiń ómirin kóbirek kórgim keldi. Mysaly ol Maıkl Djeksonmen kezdesti. Olar kezdesken kezde týyndyny dúnıege ákelý maqsatynda biraz áńgimelesken bolatyn. Sondaı sátteri fılmge enbeı qalǵan.
— Osy jyly siz I am singer baıqaýynda Queen tobynyń 3 ánin oryndaǵan edińiz. Ózińiz oryndaǵan osy ánderdiń maǵynasyn qalaı túsinesiz?
— Bul keremet áser boldy. Osy ánderdi oryndaıtynymyzdy bilgen kezde men qatty qýandym. Óıtkeni bul — klasıka bolyp ketken týyndylar. Mysaly qazirgi tańda "Show must go on" sekildi kúrdeli ándi tanymal qylý qıyn. Selın Gıonnyń "Tıtanık" degen áni de bar. Osyndaı ánderdi hıt qylý áldeqaıda aýyr. Biraq bir ereksheligi mundaı ánder uzaq jyldar boıy hıt bolyp qalady. Sol "Tıtanık" ánimen Selın Dıon áli kúnge deıin kórermenderge lyq toly stadıon jınap júr. Siz aıtqan "Bogemskaıa rapsodıa" atty án qurylymy jaǵynan óte kúrdeli án. Biraq sol án áli kúnge deıin kórermenderdiń qulaǵynyń quryshyn qandyryp júr. Mundaı ánder hıt bolsa tyńdarmandar bul ánderdi eshqashan umytpaıdy. Kásibı túrdegi jeńil ánder hıt bolǵan kúnniń ózinde de tez umytylady.
— Ózińizdiń alǵashqy án jınaǵyńyz týraly aıtyp berseńiz.
— Bul án jınaqty men belgili bir baǵyt boıynsha, belgili bir stılde bolsyn degen nıette jazbadym. Bul meniń eń alǵashqy án jınaǵym. Meniń shyǵarmashylyǵymdaǵy eń mańyzdy sátterdiń biri. Atalmysh án jınaqtyń basym kópshiligi neoklassıka baǵytyndaǵy ánder jáne qazaqtyń halyq ánderi de bar. Barynsha sapaly jınaq shyǵarýǵa tyrystym. Alys jaqyn elderdegi kompozıtorlarmen qoıan-qoltyq aralasyp, birge jumys istedik. Solardyń qatarynda reseılik Igor Krýtoı da bar. Tyńdap baǵasyn berińizder. Kórermenderdiń kóńilinen shyǵyp jatsa, bul men úshin úlken jeńis bolar edi.
Usynǵan: Ásel Bolatqyzy
Pikir qaldyrý