Alataýdyń baýraıyndaǵy alyp shahar Almatynyń irgesindegi «Dostyq úıinde» BUU-nyń 6 tiline aýdarylǵan qazirgi qazaq ádebıeti antologıalarynyń tanystyrylymy bolyp ótti dep jazady Qamshy.kz aqparat agenttigi turkystan.kz saıtynyń deregin negizge alyp.
«Jahandaǵy zamanaýı qazaqstandyq mádenıet» aıasynda atqarylǵan jobanyń tanystyrylymyna shyǵarmalary alǵashqy antologıalarǵa kirgen avtorlarmen qatar jobaǵa úlesin qosqan Ulybrıtanıa, Ispanıa, Reseı, Fransıa, Qytaı, Egıpet, jáne Taıaý Shyǵys elderiniń aýdarmashylary men ádebıetshileri, aýdarma jáne baspa uıymdarynyń basshylar qatysty.
Saltanatty sharanyń shymyldyǵyn ashqan QR Prezıdenti ákimshiligi İshki saıasat bóliminiń meńgerýshisi, «Jahandaǵy zamanaýı qazaqstandyq mádenıet» jobasyn iske asyrýǵa jaýapty jumys tobynyń jetekshisi Aıda Balaeva:
«Óner men mádenıet qaıratkerleri, qadirli qonaqtar 12 sáýirde Elbasy N.Á.Nazarbaev «Rýhanı jańǵyrý» baǵdarlamasynyń bastalǵanyna 2 jyl toldy.Urpaq taǵdyryn tarıh tereńine boılaı otyryp, bolashaqqa qajet qasıetterdi boıyna sińirýge bastaý bolǵan baǵdarlama ulttyq rýhymyzǵa erekshe serpilis ákeldi. Búgingi jıynda osy jumystyń tabysty ótýine atsalysyp kelgen barsha halyqqa zor rızashylyǵymdy bildiremin. Ásirese alystan kelip otyrǵan sheteldik qonaqtarymyz sońǵy bir jylda qyrýar jumys atqardy» - dedi.
Atalmysh joba aıasynda «Qazaqstannyń qazirgi poezıasynyń antologıasy» men «Qazaqstannyń qazirgi prozasy antologıasy» ázirlendi. Bul joba qazaq mádenıetin álemge tanystyryp, quńdylyǵyn arttyryp, baılanys ornatýǵa baǵyttalǵan. 160 qazaqstandyq avtordyń tańdamaly shyǵarmalary álemniń eń iri 6 tiline aýdarylyp, bedeldi baspalardan shyǵyp 5 qurlyqtaǵy 90-nan asa elge jol tartty. «Jahandaǵy zamanaýı qazaqstandyq mádenıet» jobasy boıynsha jalpy sany 2 mıllıard 600 mıllıon halyq qazirgi qazaq ádebıetiniń jaýharlarymen tanysýǵa múmkindik alady.
Jıyn barysynda sheteldik qonaqtarmen qatar avtorlar sóz alyp aýdarma isindegi mańyzdy máseleler talqylandy. Naqtyraq aıtqanda, Qazaq ádebıeti úlgilerin shet tilinde sóıletý barysynda aýdarmanyń kórkemdik sapasyn qamtamasyz etý jaıynda sóz qozǵaldy.
Usynǵan: Ásel Bolatqyzy
