Muhtar Áýezov atyndaǵy Qazaq memlekettik akademıalyq drama ­teatrynda araǵa 52 jyl salyp, «Qara qypshaq Qobylandy» dastan-dramasy qaıta sahnalandy. Qoıylymnyń rejıseri – Qazaqstannyń eńbek sińirgen qaıratkeri Nurqanat Jaqypbaı dep jazady Qamshy.kz aqparat agenttigi anatili.kazgazeta.kz saıtynyń deregin negizge alyp. 

Qoıylymnyń akterlyq quramynyń ereksheligi – jastar men tájirıbeli sahna sańlaqtarynyń biriktirilýi. Bul spektáklge akterlyq qurammen kúni-túni daıyndyq júrgizgenin aıtqan rejıser jastarǵa basymdyq berilgenin atap ótti.

– Spektákldiń akterlik quramy teatr basshylyǵymen kelise otyryp tańdaldy. Bıyl 2019 jyl «Jastar jyly» bolǵandyqtan, basshylyqtyń talaby jastardy sahnada kórý boldy. Bul oı maǵan óte unady. Bolashaq jastardyki. Jastar osyndaı úlken mektepti kórip ary qaraı damýy kerek. Keshegi akterler erteń osy teatrdy alǵa súıreıdi dep senemin, – dedi N.Jaqypbaı.

Bul qoıylymnan jas akterlardyń shyńdalyp, tájirıbe jınaqtap kele jatqanyn kórýge bolady. Aıta ketsek, Qobylandy rólin jas akter – Ǵalymbek Ospanov, Qurtqa rólin – Qazaqstan ­Jastar Odaǵy «Serper» syılyǵynyń ­laýreaty Lázzat Qaldybekova, Qara­mandy – Maǵjan Asaýbaı somdady. Sony­men birge sahna maıtalmandary Aıdos Bektemir, Bolat Ábdilmanov, Dýlyǵa Aqmolda, Nazgúl Qarabalına, Baıan Qajynabıeva syndy akterlar óner kórsetti.

Sahnany dekorasıamen kórkemdegen qoıýshy sýretshi – Murat Saparov. Onyń qoltańbasy shyǵarmanyń kórermenmen baılanysyna yqpal etti.

– Qobylandynyń bizge jetken 29 nusqasy bar. Biz qoıǵan nusqa Muhtar Áýezovtyki. Sebebi jazýshy sahnalyq nusqasyn daıyndaǵan. Qoıylym kórermenniń kóńilinen shyqpasa, telefon shuqylap otyrady, ketip qalady. Al keshegi qoıylymda jastar kóp boldy. Jastarǵa unasa óte jaqsy. ­Jastar nazaryn qazir ınternetten, telefonnan teatrǵa aýdarý óte qıyn. Eki saǵat qoıylymdy kórip otyrý ońaı emes, ásirese jas býynǵa. Biraq keshe kórermen jaqsy qabyldaǵanyn baıqadym, – deıdi qoıylymnyń qoıýshy sýretshisi M.Saparov.

Qoıylymdy qoıý úshin barlyq múmkindikter qoldanylǵan. Joǵary kóterilip-túsetin sahna, sheńberdiń aınalýy, Qobylandynyń ushatyn Taıbýryl aty… taǵysyn taǵy degendeı. Jańa qoıylymda Taıbýryldyń ózi negizgi keıipkerge aınalǵan. Al Kóklan shyǵar­mada jaǵymsyz keıipker bolsa, ol qoıy­lymda óz tragedıasy bar, máńgi jasaıtyn kóripkel beınesinde somdalypty.

1967 jyly ekinshi ret qoıylyp, sahnada uzaq júrgen pesanyń sózderi sol qalpynda saqtalǵan. Degenmen, jańa qoıylym qazirgi zamanǵa laıyqtalyp berildi.

Aıta keteıik, qoıylym alǵash ret 1946 jyly Qapan Badyrovtyń, al 1967 jyly Ázirbaıjan Mámbetovtiń rejıs­serligimen qoıylǵan. Araǵa 52 jyl salyp qaıta qoıylǵan pesa endi ákemteatrdyń repertýarynan berik oryn alǵan.

Usynǵan: Ásel Bolatqyzy