Almaty qalasynda Ǵalym Jaılybaıdyń «Sulýbaıdyń áni» kitabynyń tusaýkeseri ótti. «Er Jánibek» halyqaralyq qoǵamdyq qorynyń qoldaýymen jaryq kórgen kitap qazaq, túrik, orys jáne aǵylshyn tilinde jaryq kórgen dep jazady Qamshy.kz aqparat agenttigi.
«Sulýbaıdyń áni» atty dastannyń tusaýyn Halyq jazýshysy Qabdesh Jumadilov, akademık, dintanýshy Ábsattar qajy Derbisáli, kórnekti jazýshy Maral Ysqaqbaı, memlekettik syıylyqtyń ıegeri Sábıt Dosanov, Jazýshylar Odaǵynyń tóraǵasy Ulyqbek Esdáýlet, uıǵyr ádebıetiniń aqsaqaly Ahmetjan Áshırı, ardagerler keńesiniń tóraǵasy Hamıt Birjanovtar kesti.
Budan bólek sharaǵa qoǵam qaıratkerleri, kórnekti aqyn, jazýshylar, akademıkater Baltash Tursynbaı, Dandaı Ysqaq, Hankeldi Ábjanov, Bıbigúl Imanǵazına, Kúlásh Ahmetova, Islam Jemeneı, Tynymbaı Nurmaǵanbetov, Beıbit Qoıshybaı, Jaqaý Dáýrenbek, Ýálıhan Qalıjan, Temirhan Tebegenov, Nurtileý Imanǵalı, Kenjehan Matjan, Jumabaı Baıahmet, Jádı Sháken, Almas Ahmetbek, Maǵıza Qunapıa syndy azamattar men Almaty ákiminiń keńesshisi Mamaı Ahlet jáne kitaphanalar júıesiniń qyzmetkerleri, JOO-nyń túlekteri qatysty.
Ǵalym Jaılybaı, aqyn: «Sulýbaıdyń áni» kitabynyń jazylýynda Qytaı qazaqtarynan jetip jatqan túrli habarlar áser etken bolý kerek… Men endi ol jaqty kóp aralaǵan qazaqtyń birimin. Sulýbaı degen aqyn ótken. Ospan batyrdyń kóterilisine qatysqan. 37 jasynda opat bolǵan. Sol kisiniń:
« Basynda máýesi joq qý qaıyńnyń,
Jigitke paıdasy joq ýaıymnyń.
San jerdiń dámin tatyp, sýyn ishtim,
Bilmeımin qaıda alaryn qudaıymnyń.
Qaıqaıa shapqan qarager,
Qaırylar ma eken qara jer» – degen áni bar. Sol qatty áser etti. Jalpy, men kóp izdendim. Segiz bólimnen turatyn poema jazyp shyqtym. Bunyń ishinde kóp dúnıe bar dep oılaımyn.
Júrsin Erman, aqyn: Búgin qazaqtyń kórnekti aqyny Ǵalym Jaılybaıdyń «Sulýbaıdyń áni» degen kitabynyń tusaýyn keseıin dep turmyz. Ǵalym kitap shyǵarmaı júrgen adam emes. Sońǵy jyldary shyǵarmalary molynan jaryq kórip júr. Myna kitaptyń ereksheligi, bul tórt tilde jaryq kórgen kitap. «Sulýbaıdyń áni» degen dastany qazaqsha, túrkishe, oryssha, aǵylshynsha basylyp, baspadan qanat qaǵyp ushyp, halyqtyń qolyna tıip jatyr. Bul dastannyń taqyryby da kúrdeli. Qazir bizdiń arǵy bettegi qandastarymyzdyń basyna kún týyp turǵan kezde der kezinde jazylǵan kitap. Qazaqtyń arǵy bette de biraz batyrlary bolǵan. Keshegi Ospan batyr, Zýqa batyrlar Táýelsizdik úshin arparysqan. Myna Sulýbaı da batyr, seri, sal, taǵdyry sherli adam. Sol sebepti buny sherli dastan dep ataýǵa bolady. Sol Sulýbaıdyń bizge jetken ániniń negizinde aqynnyń júregine shoq bolyp túsken. Bul áli talaı áńgimege arqaý bolatyn dastan. Jalpy, Ǵalym dastan jazýǵa beıimdelip júrgen úlken aqyndarymyzdyń biri.
Jeńis Túrkıa: «Er Jánibek» qorynyń prezıdenti: Búgin shyǵyp otyrǵan «Sulýbaıdyń áni» kitaby ótken ǵasyrdyń 1930-1940 jyldary Qytaıdyǵy qazaq halqynyń taǵdyryn búginmen ushtastyrǵan keń kólemde jazylǵan úlken shyǵarma dep otyrmyz. Jalpy, bul poema, tarıhı roman emes. Sondyqtan onda adamnyń sezimi, tabıǵaty, erligi týraly tolyq baıandalǵan dep aıta alamyn. Qazaqı júregi bar adamdarǵa bul óte túsinikti, tyń týyndy.
Derekkóz: qazaqtimes.com
Usynǵan: Ásel Bolatqyzy
