Kez-kelgen aımaqta adam aıaǵyn attap basýǵa qorqatyn záýlim ǵımarattar, jartylaı soǵylǵan nysandar nemese belgili bir tylsym kúshke ıe oryndar bolady. Atalǵan jerlerden adamdar ártúrli túsiniksiz beınelerdi, dybystardy baıqap, sodan keıin áńgime taraǵan ústine taraı beredi.
Búgin sizderdiń nazarlaryńyzǵa Almaty shaharyndaǵy kóptiń kókeıinde úreı ornatqan mıstıkalyq oryndar týraly aqparatty usynamyz. Qamshy.kz aqparat agenttigi bul aqparatty El.kz portalynyń maǵlumattaryna súıene otyryp jazdy.
1. Qańyraǵan UOS gospıtali
Atalǵan gospıtáldi ótken ǵasyrdyń 40-jyldary UOS ardagerleri men múgedekteri turǵyzǵan. 90 jyldary munda Aýǵanstan soǵysynyń ardagerleri em qabyldaǵan eken. Qatty jer silkinisi emhananyń shatyryn zaqymdaǵan soń, emhana bos qalady. Desek te, qańyrap qalýyna tek tabıǵat apaty ǵana sebepker emes sekildi. Munda dárilik zattar, oryndyqtar ár jerde shashylyp jatyr. Al kireberis esigi qubyjyq kirip keterdeı nemese ishindegi eles ataýlylary syrtqa shyǵyp ketpesin degendeı tas bekitilgen. Bul oryn Almatydaǵy elester mekendeıtin ataqty jerge aınalǵan.
2. «28 panfılovshylar» saıabaǵy
Almatylyqtar úshin demalys ornyna aınalǵan saıabaqta qandaı mıstıkamen baılanysty oqıǵalar bolyp turady deısiz ǵoı?... Mýzyka aspaptarynyń murajaıyna qarama-qarsy betten ylǵı aq kóılektegi qyzdyń elesi júredi eken. Sondaı-aq, osy mańdaǵy shirkeýdiń astynda jer asty joly bar-mys. Onda tórt tonnalyq qońyraý jatýy múmkin. Qońyraý jer silikinisi bolardyń aldynda soǵylyp, dybys beredi eken.
3. Qapshaǵaı tas joly
Jyl saıyn Qapshaǵaı tas jolynda kóptegen keleńsiz jaıttar bolyp jatatyny jasyryn emes. Keıbireýler atalǵan joldyń astynda mazar bar dese, keıbiri osy jolda qaıtys bolǵandardyń arýaǵy maza bermeıdi dep jatady. Sondaı-aq, tún aýasynda tuıaqty qyzdyń beınesin kórgen adamdar da jeterlik. Ol jol jıeginde kólik toqtatyp turady eken. Sol sebepti, júrgizýshiler bul mańnan temir tulparlaryna eshkimdi otyrǵyzbaýǵa tyrysady.
4. Baým toǵaıy
"Men bul mańǵa jaısyz sezimmen bettedim. Buryn aýyldaǵy toǵaıdan kórgen beıne kóz aldyma kelgende, tipti tilim baılanyp, bireý ústimnen sýyq sý quıyp jibergendeı boldy. Qasymdaǵylar da birtúrli kúıdi bastarynan ótkergenderin aıtty. Biraq eshqandaı eles kórmepti" deıdi Ánýar esimdi jigit. Rasymen, kópshilik munda elesterdiń ary-beri júretini jaıly jıi aıtady. Buryn munda arhıepıskopty qınap óltirgen deıdi (maza tappaı júrgen sonyń arýaǵy bolýy múmkin). Ol ólerdiń aldynda Baým toǵaıyna shirkeýdegi qasıetti zatty jasyryp ketipti.
5. Jer asty shirkeýi
Medeý mańynda Serafım men Anatolıı esimdi eki monah turǵyzǵan skıt (monastyr) bar. Ýspen shirkeýine qaraǵan bul skıt ótken ǵasyrda ylǵaldyń kóptiginen tómen túsip ketken. El aýzynda ol jerdi arýaqtar meken etedi degen ańyz tarap júr. Keıbireýleri monastyrdy salǵan eki monahty osy jerde óltirip ketkenin aıtady. Mine, solardyń arýaqtary tynym tappaı kelýshelirdi jıi mazalaıdy eken.
6. Medeýdegi arýaqtar meken etetin úı
Bul úı negizi meıramhana bolýy kerek bolǵan. Biraq, qurylysty júrgizgender jıi mıstıkalyq oqıǵalarǵa tap bolǵan soń, ary qaraı jumys júrgizýden bas tartqan. Sodan beri úı qańyrap bos tur. Munda kelýshilerdiń kóbisi úıdi ashýly eles meken etedi deıdi.
7. "Qazaqstan" kınoteatry
Kınoteatrdyń astynda buryn adamdar kirip-shyǵa beretin úńgir bolǵan deıdi. Onda qurylys barysynda qaza bolǵandardyń eleseteri júredi-mys. Kınoteatrda jumys isteıtin qyzmetkerler tómennen adamnyń júrgen dybysyn jıi estıtindikterin aıtqan. Tek tómennen emes, túnge kezekshilikke qalǵan kúzetshi kınoteatr ishinde oryndyqta otyrǵan adamnyń elesin kórgenin málimdegen.
Usynǵan: Ádilet Mádenıet
