L.N. Gýmılev atyndaǵy Eýrazıa ulttyq ýnıversıtetinde "Rýhanı jańǵyrý-Spiritual development" volonterlik klýbynyń aıasynda "Uly dala ulandary" atty baǵdarlamalyq kesh uıymdastyryldy. Bul jastardyń volonterlik klýby halyqaralyq qatynastar fakúlteti shetel tilderi kafedrasy janynda qyzmet atqarady.
Klýb jetekshisi – aǵa oqytýshy Salıeva Dınara Ońǵarbaıqyzy. Aq dastarqan jaıylyp, ónerpazdar ulttyq naqyshtaǵy kıimde óner kórsetti. Joǵary deńgeıde uıymdastyrylǵan keshte myń buralǵan bıshiler, kúıshiler, kúmis kómeı ánshiler, qazaqtyń tól óneri aıtys, salt-dástúr,oıyn-saýyq – barlyǵy boldy.
Keshtiń qadirmendi qonaqtarynyń arasynda Germanıadan kelgen profesor – Maıkl Neder, Ispanıadan – Hýlıo Novıllo, Polshadan – Edıta Denst-Garsıa jáne halyqaralyq qatynastar fakúlteti, tarıh fakúlteti men jýrnalısıka jáne saıasattaný fakúltetiniń basshylyǵy jáne oqytýshy-professorlyq quramy men stýdentteri boldy.
Kesh barysynda jýrnalısıka jáne saıasattaný fakúltetiniń 1-kýrs stýdenti Rıspanbetov Qaırat pen aqparattyq tehnologıalar fakúltetiniń 1-kýrs stýdenti Oǵaspaev Muhtar sahna tórine shyǵyp, aıtys ónerin jańǵyrtyp, súbeli sóz ben ónegeli oı aıtty. Al, Erasyl Mamyr men Sársenbek Arýjan áýezdi án aıtyp, qulaqtyń quryshyn qandyryp, kórermenderdiń kóńilin bir kóterdi.
Merekelik sharany "Dala sazynan" kelgen ónerli qyz-jigitter qyzdyra tústi. "Naǵyz qazaq qazaq emes, naǵyz qazaq- dombyra" demekshi, jınalǵan qaýymǵa "Adaı" kúıin oryndap, qurmet- qoshemetke bólendi. Qaımaǵy buzylmaǵan qazaqılyqty boıyna sińirgen klýbymyzdyń músheleri – "Shańyraq" teatrynyń ártisteri ultymyzdyń salt-dástúrlerin kórnekilep kórsetti. Sonymen qatar, arnaıy qonaqqa kelgen sheteldik profesorlarmen "Qara jorǵa" bıi bılenip, ulttyq kıimderimiz syıǵa tartyldy dep habarlaıdy Qamshy.kz aqparat agenttigi Masaget saıtyna silteme jasap.
Jastardyń ádet-ǵurypqa qanshalyqty jaqyn ekendigin synaý úshin oıyn uıymdastyrylyp, "bastańǵy, esik ashar, bata berý, tilashar degenimiz ne?" degen suraqtar qoıylyp, durys ári tolyq jaýap bergen kórermenge káde syı usynyldy. Qazaq ónerin, qundylyqtaryn dáripteýge baǵyttalǵan is-shara elimizdiń basty ánderiniń birine aınalǵan, Qadyr Myrza Álı atamyzdyń sózine jazylǵan "Óz elim" ánin barsha ónerpazdardyń oryndaýymen aıaqtaldy.
Qazaqstan – kópetnıkalyq memleket, qazaqtyń ulttyq qundylyqtaryn elimizdiń ózge ult ókilderi de qurmettep, dáripteıtindigin ýkraın qyzy Levchenko Alına dáleldedi. Ol otanyna degen mahabbatyn "Týǵan jer" atty ánmen jetkizip, salt-dástúrdi jaqsy meńgergendigin kórsete bildi. Qoryta kelgende, ulttyq qundylyqtar men salt-dástúrdi ulyqtaýdyń mańyzdylyǵyn basa aıtamyz. Bolashaq – elin súıetin, halqynyń qundylyqtaryn syılaıtyn jáne óziniń áleýetin tolyq júzege asyra alatyn ozyq jastardyń qolynda. Osy oraıda, keshtiń aýyz toltyryp aıtarlyqtaı deńgeıde ótýine úles qosqan barlyq belsendilerge alǵys bildiremiz.
Usynǵan: Ádilet Mádenıet
