Búgin Baqyt Sultanovtyń tóraǵalyǵymen qalalyq ákimdiktiń kezekti otyrysy ótti, dep habarlaıdy Qamshy.kz aqparat agenttigi elorda ákimdiginiń resmı saıtynyń deregin negizge alyp.

Otyrys basynda qala ákimi Baqyt Sultanov Nur-Sultan qalasynyń prokýrory laýazymyna taǵaıyndalǵan Baýyrjan Myrzakerovty, Polısıa departamentiniń bastyǵy qyzmetine taǵaıyndalǵan polısıa polkovnıgi Erjan Sadenovty jáne ınvestısıa jáne kásipkerlikti damytý basqarmasy basshysynyń qyzmetine jańadan taǵaıyndalǵan Erlan Bekmyrzaevty tanystyrdy.

Kún tártibindegi alǵashqy másele qalanyń turǵyn úı-kommýnaldyq sharýashylyǵynyń qazirgi ahýaly: ekologıalyq senbilik, jylytý maýsymyn aıaqtaý boıynsha qala ákiminiń orynbasary Arman Turlybek baıandap berdi. Onyń aıtýynsha, búgingi tańda qalanyń barlyq tirshiligin qamtamasyz etý mekemeleri qalypty rejımde jumys isteýde. Eleýli tótenshe jaǵdaılar tirkelgen joq.

"Qalada eki aı boıy sanıtarlyq tazalaý jumystary júrgizildi. Kóp jumys atqaryldy. Alaıdy bul baǵyttaǵy jumystardy toqtatýǵa bolmaıdy. Bul sharalardy jalǵasytyryp qana qoımaı, olarǵa komýnaldyq qyzmetterdi, PIK-di ǵana emes barlyq qala turǵyndaryn tartý kerek", – dedi Baqyt Sultanov. 

Sondaı-aq qala ákimi 2010 jyly "Astana qalasynyń shet aımaqtarynyń 2020 jylǵa deıin orta merzimdi perspektıvada damytý tujyrymdamasy" bekitilgenin eske saldy.

"Búgingi tańda bizdiń shet aımaqtarǵa qarap, jumys júrgizilmedi dep aıtýǵa bolady. Joldardan bastap, qarapaıym kósheni jaryqtandyrýǵa deıin", - dep atap ótti qala ákimi. Osy oraıda ol aýdan ákimderine 27 mamyrǵa deıin "Astana qalasynyń shet aımaqtaryn 2020 jylǵa qaraı orta merzimdi perspektıvada damytý tujyrymdamasy" aıasynda atqarylǵan jumystar týraly esepti usynýdy; orta merzimdi perspektıvaǵa arnalǵan "Astana qalasynyń shet aımaqtaryn damytý tujyrymdamasyna" uqsas qalalyq qujattardy aýdan bóliginde daıyndaýdy; tıisinshe, qala mańyndaǵy eldi mekenderdi damytý úshin jeke jaýapkershilik qabyldaýdy tapsyrdy.

B. Sultanovtyń aıtýynsha, kún saıyn astanaǵa Aqmola oblysynyń jaqyn ornalasqan eldi mekenderinen 60 myńǵa jýyq azamat keledi. Onda turatyn halyqtyń kópshiligi qaladaǵy qyzmetterdi paıdalanady, elordada jumys isteıdi, bilim alady.

"Qala mańyndaǵy eldi mekenderde jumys oryndaryn qurý, orta bilim alý úshin ǵana emes, sonymen qatar orta arnaıy bilim alý, bos ýaqytty ótkizýge arnalǵan oryndardy jáne t.b. qolǵa alý kerek. Bul aýyldardyń barlyǵy astananyń mártebesine saı bolýy kerek, óıtkeni ol astananyń dál irgesindegi aýmaq", – dedi ákim.

Baqyt Sultanov aýdan ákimderine 1 maýsymǵa deıin Aqmola oblysy ákimdikterimen jáne aýdandarmen azamattar úshin ómir súrý deńgeıin kóterý boıynsha jumysty úılestirýdi, Aqmola jáne Qaraǵandy oblystarynyń qatysýymen birlesken jumys toptaryn quryp, Jol kartasyn ázirleýdi, eldi mekenderdi birlese damytýdy tapsyrdy. Taǵy bir qaralǵan másele aýla alańdarynyń qaýipsizdigine qatysty boldy.

"Búgingi tańda aýlany qaýipsizdikpen qamtamasyz etetin naqty operator joq. Aýdan ákimdikteri qalalyq orta sapasy jáne baqylaý basqarmasyna silteıdi. Olar páter ıeleriniń koopreatıvterine silteıdi. Polısıa departamenti ákimdikke silteıdi. Jaýapty adam joq!", - dedi B. Sultanov.

"Qala ákimi aýdan ákimderine, qalalyq orta sapasy jáne baqylaý, ınvestısıalyq jáne kásipkerlikti damytý basqarmalarynyń basshylyǵyna  polısıa departamenti jáne Páter ıeleriniń kooperatıvterimen birlesip, 27 mamyrǵa deıin "Qaýipsiz aýla" baǵdarlamasyn ázirleýdi tapsyrdy. Bilim berý basqarmasynyń basshysy Ánýar Janǵozın Biryńǵaı ulttyq testileýge (UBT) daıyndyq barysy týraly baıandady. Onyń derekteri boıynsha bıyl elordalyq mektepterdi 6747 túlek támamdaıdy. Aldyn ala derekter boıynsha onyń 5 856-sy UBT tapsyrady. "Altyn belgige" úmitkerlerdiń sany 304 qurasa, úzdik atestattan 250-ge jýyq oqýshy úmitti", – dedi A.Janǵozın.

Respýblıkada UBT-ny ótkizý merzimi 20 maýsym men 5 shilde aralyǵyna belgilengen. Al Nur-Sultanda UBT qaı ýaqytta ótetini maýsym aıynyń basynda belgili bolady.