"Golos detı" baıqaýynyń fınalısi Erjan Maksım men onyń anasy "Talk like" baǵdarlamasyna suhbat berdi dep jazady Qamshy.kz aqparat agenttigi. 

— Jeńiske degen senim qansha paıyz boldy? 

Erjannyń anasy: Saıys barysynda tálimgeri úlken úmit artty. Biz de jeńisten úmitimiz boldy. Biraq fınal kezinde Erjan keshke deıin daıyndyq kezinde boldy. Keı qatelikteri boldy, notasyna jete almaı qalǵan jerleri boldy. Sol kezde ishteı durys aıta almaı qaldy ma dep oıladyq. Jeńiske degen senim 100 paıyz boldy dep aıta almaımyn. Shamamen 70-80 paıyz senimdi boldyq. Sebebi qarsylastar óte talantty edi. 

— "Golos detı" baǵdarlamasy ádil ótpedi" degen reseılik tanymal juldyzdar boldy. Qalaı oılaısyz, sýper fınal ádil ótti me?

Erjannyń anasy: –Ádil ótti dep oılaımyn. Sebebi, biz kim qalaı daýys bergenin bile almaımyz ǵoı. Men sol kezde bul týraly oılaı almadym. Sebebi Erjan oryndaǵan án óte kúrdeli boldy. Dımashtyń daýys tonynda aıtty. Uıymdastyrýshylar da tańǵaldy. Men fınal kezinde daýysyna zaqym kelmese eken dep otyrdym. Nátıjeni aıtqan kezde "áttegen-aı" degen kez de boldy. Óıtkeni, Erjan bar kúsh jigerimen óz deńgeıinde aıtyp shyqty. 

— Baǵdarlamada jeńiske jetken qyzdyń anasy Alsý — tanymal ánshi, al ákesi — qaltaly bıznesmen. Onyń jeńiske jetýine qomaqty qarajattyń kómegi bolǵan joq pa? Qalaı oılaısyz?

Erjannyń anasy: –Alsý óte qarapaıym áıel. Qyzy da sondaı. Aqsham bar dep shalqaıyp júretin adamdar bolady ǵoı. Biz birge tamaqtanyp júrdik. Múmkin halyq shynymen Alsýdyń qyzyna daýys bergen bolar. 

— Maksım Galkın "mundaı baǵdarlamalarǵa óz balalarymdy qatystyrmas edim. Sebebi balalarymnyń mundaı ádiletsizdikke dýshar bolǵanyn qalamaımyn" dedi. Siz "Erjannyń saǵyn syndyryp aldym -aý" dep ókinbedińiz be?

Erjannyń anasy: –Joq, ondaı oıda bolmadym. Sebebi men halyqtyń rıza bolǵanyn kórdim. Sebebi kóp adamnyń turyp, qol shapalaqtap jylaǵanyn da baıqadym. Erjan da jylady. Jylap turyp án aıtty. Men balammen túrli baıqaýlarǵa bardym. Men ulymnyń qınalyp án aıtqanyn kórdim, sezindim. Al halyqtyń úlken rızashylyqpen tik turyp, qol shapalaqtaǵanyn kórip, ózimdi jubattym. 

— Nátıje shyqty. Qorytyndy anyqtaldy. Sol kezde Erjannyń aıtqan alǵashqy sózi qandaı boldy?

Erjannyń anasy: –Erjandy biz kórmedik. Bizdi shyǵarmady ǵoı.  Bári aıaqtalǵan soń kórdik. Ol qobaljyp, jylap, kózi móldirep bizge qarap turdy. Men endi qataldaý qaraımyn. Erjannyń ádeti ol adamnyń birinshi kózine qarap alady. Sol jerde ákesi de boldy. Bárimiz qoldaý kórsettik. Árıne, ońaı tıgen joq. Shyqqan kezde Erjannyń daýsy qarlyǵyp, kishkene aýyryp qalypty. Barlyǵymyz bir qushaqtasyp jylap aldyq. 

— Erjan, bas júlde almaǵanyńa muńaıǵan sátiń boldy ma?

Erjan: –Negizi bas júlde almaǵanym da jaqsy boldy. Eger men bas júlde alsam, olar meni quttyqtap qoıa salatyn edi. Al bas júlde almaǵan kezimde, kóp adam qoldaý bildirip, quttyqtap jatty. Bul meni qýantty. Qoldap, qolpashtaǵan adamdarǵa alǵysymdy aıtamyn. Keıin Alla Pýgachevamen kezdestik. Ol óziniń aqylyn aıtty. Sondaı-aq ol meni túsinde álemdik juldyz bolyp jatqanymdy kórgen. 

— Mıladze sizderdi qalaı shyǵaryp saldy?

–Qımaı qoshtasty desek te bolady. Qazaqstanda birneshe konserti bolady eken. Soǵan baılanysty óz usynystaryn aıtty. Sosyn eń qyzyǵy, Mıladze azdap qazaqsha sóıleı bastady. Birde Erjanǵa ol "Aınalaıyn" dep aıtqan. Bul týraly maǵan Erjan aıtyp berdi. Keıin "qaıyrly kún, eto dobryı den?" dep surady. Men "ıá, muny qaıdan bilesiz" dep suradym. Al ol "Batyrhan úıretti" dep jaýap berdi.   

Daıyndaǵan: Ásel Bolatqyzy