QR Parlament Senatynyń qarjy jáne búdjet komıteti Atyraýda elimizdiń ınvestısıalyq klımatynyń damýy máselesin talqylady, - dep habarlaıdy Qamshy.kz aqparat agenttigi Óńirlik komýnıkasıalar qyzmetiniń deregin negizge alyp.

Senatorlar men jergilikti atqarýshy organdar strategıalyq ınvestorlardy tartý jáne ekonomıkanyń basym baǵyttarynda «zákirli ınvestorlarmen» birikken kásiporyndar qurý jóninde pikirlerimen bólisti.

Komıtet tóraǵasy Olga Perepechınanyń aıtýynsha, sońǵy jyldary ınvestısıalyq klımatty jaqsartý boıynsha qabyldanǵan sharalardyń arqasynda Qazaqstan ınvestısıalyq tartymdylyǵyn arttyryp, ǵalamdyq básekege qabilettilik ındeksi men Dúnıejúzilik banktiń Doing Business reıtingindegi kórsetkishterin jaqsartty.

— Búgingi kúni ınvestısıalyq klımatty jaqsartý boıynsha problemalyq máselelerdi joıý úshin Úkimet kásipkerlik salasynda, sonyń ishinde salyq salasynda zańnamalardy jetildirý máselesin qaraýda, - dep atap ótti Olga Perepechına.

— Atyraý oblysyn kezdeısoq tańdaǵan joqpyz, bul aımaq elimiz boıynsha básekege qabilettilik reıtinginde aldyńǵy orynda tur, ekonomıkalyq damý qarqyny joǵary óńir.
Aıryqsha atap ótý kerek, Atyraý oblysy otandyq iri ınvestorlar úshin de, sheteldik ınvestorlar úshin de tartymdy aımaq, elimizdegi ınvestısıa kóleminiń úshten birge jýyǵy osy aımaqqa tıesili.

​QR Syrtqy ister mınıstrligi Investısıa komıteti tóraǵasynyń orynbasary Larısa Jumaǵalıevanyń aıtýynsha, 2019 jyldyń qańtar-naýryz aılarynda negizgi kapıtaldaǵy ınvestısıa mólsheri 7%-ǵa artyp, 2,1 trln teńge boldy. Atyraý oblysynda ınvestısıa osy ýaqyt aralyǵynda 10,3%-ǵa joǵarylap, 1 trln teńgege jetti.

— Atyraý oblysynda sheteldik ınvestorlardyń qatysýymen qolǵa alynǵan jobalar qatarynda 11,4 mlrd dollar somasyndaǵy 7 joba bar, onyń ishinde 4,7 mlrd dollardyń 4 jobasy júzege asyp jatyr, 6,7 mlrd dollardyń 3 jobasy daıyndalýda, - dep naqtylady Larısa Jumaǵalıeva.

​Atyraý oblysynyń ákimi Nurlan Noǵaevtyń aıtýynsha, búginde aımaq álemniń 50 elimen baılanys ornatqan, bul 1000 kompanıa degen sóz.

— Elbasynyń ár óńirdiń múmkindigin paıdalana otyryp, ekonomıkany dıversıfıkasıalaý týraly tapsyrmasy bar. Atyraý oblysy ónerkásiptik óndiriste kóshbasshy, ıaǵnı, respýblıkalyq kólemniń 25% munaıly óńirdiń enshisinde. Óńdeý ónerkásibine de kóńil bólip otyrmyz. Aýyl sharýashylyǵy, óńdeý ónerkásibi sekildi basqa salalarǵa da ınvestısıa tartýǵa múddelimiz,-dedi Nurlan Noǵaev.
Múmkindikter bar, bastysy – ınvestısıalyq tartymdylyq. Investısıa tartý júıesi quryldy, - dep esepteıdi Parlament Senatynyń depýtaty Ǵumar Dúısembaev.

— Premer-Mınıstr ınvestısıalyq ombýdsmen bolyp taǵaıyndaldy. Indýstrıa jáne ınfraqurylym mınıstrliginiń ınvestısıa komıteti Syrtqy ister mınıstrligine berildi, óıtkeni ınvestısıa tartýda syrtqy ınvestısıalardyń úlesi kóp. «Qazaqınvest» aksıonerlik qoǵamy quryldy, ol barlyq jobalardy jınaqtap, sapaly iske asýyna járdemdesedi, - dedi senator.

Árıne, ishki ınvestısıalar týraly da umytýǵa bolmaıdy. Otandyq bıznestiń múddesi ekonomıkanyq ár túrli salalaryn qamtyp otyr – aýyl sharýashylyǵy, munaıhımıa, t.b.

— 2012-2016 jyldary «Atyraý» áleýmettik kásipkerlik korporasıasyna jańa jobalar jasaý úshin 13 mlrd teńge bólindi. Osy ýaqyt aralyǵynda 35 joba iske asty, - dep atap ótti Ǵumar Dúısembaev.

Munaı-gaz salasyndaǵy «zákirli jobalar» týraly «Kazakh Invest» UK» AQ basqarma tóraǵasynyń orynbasary Rýstam Isataev aıtty.

— Búginde kompanıanyń aqparattyq-monıtorıngtik júıesinde sheteldik ınvestorlardyń qatysýymen 157 joba bar, jalpy somasy 40 mlrd dollar. Sonymen qatar, kelissózder bastalǵan basqa da ınvestorlardyń tizimi jasaldy. Mundaı jobalar sany – 123. Bul jerde Úndistan, Túrkıa, Katar elderiniń belsendilik tanytyp otyrǵandaryn atap ótýimiz kerek,-dedi Rýstam Isataev.

QR Energetıka vıse-mınıstri Áset Maǵaýov munaıhımıa salasyndaǵy iri jobalarǵa toqtaldy. Ol – polıpropılen jáne polıetılen óndirý kesheni. Polıetılen jobasynyń strategıalyq seriktesi - Borealis kompanıasy. Qazirgi ýaqytta jobalyq qujattamasy daıyndalýda. Qurylys 2021 jyly bastalady.

— Óz kezeginde, ınvestorlardyń jobaǵa kirýiniń basty sharty – Úkimetaralyq kelisimge qol qoıý ekenin atap ótkim keledi. Kelisimde memlekettik qoldaý sharalary, preferensıalar, ınvestısıany qorǵaý zańnamasynyń turaqtylyǵy, ınvestorlardyń basqa da talaptary kórsetilýi tıis,-dedi Áset Maǵaýov.

TSHO kompanıasy men NCOC konsorsıýmynyń munaıgaz jobalarynyń iri ınvestorlary talqylanǵan máselege ún qosyp, usynystaryn ortaǵa saldy.
Atyraý oblysynyń ákimi Nurlan Noǵaev ózekti máseleniń ýaqytyly kóterilip otyrǵanyn atap ótti. Ásirese balyq sharýashylyǵy salasy, sheteldik kompanıalardyń qatysy bar iri jobalardy júzege asyrýǵa sheteldik mamandardy tartý, jergilikti kompanıalardyń úlesi sekildi máseleler kún tártibinde tur.

— Zańnamaǵa engizilýi múmkin ózgertýler nátıjesin bereri sózsiz,-dedi Nurlan Noǵaev. Jınalys sońynda Qarjy jáne búdjet komıtetiniń tóraǵasy Olga Perepechına basqosý ınvestorlar úshin zańnamanyń turaqtylyǵy, valútalyq táýekeldi saqtandyrý mehanızmi, salyqtyq quqyq buzýshylyqtaǵy kemsitýshilik máselesine qatysty ınvestısıalyq klımatty jetildirý boıynsha usynystardy alýǵa múmkindik bergenin atap ótti.

— Barlyq usynystar qaperge alynyp, is júzinde júzege asýy úshin Úkimetke joldanady, - dep qortyndylady Olga Perepechına.