Mańǵystaý oblysynyń ákimi Eraly Toǵjanov Ondy aýylyndaǵy saparyn kásipkerlerdiń qoldaýymen salynǵaly otyrǵan jańa meshitten bastady. Ol jobasymen tanysyp, irgetasyn quıý rásimine qatysty. Meshittiń jalpy jer kólemi -256 sharshy metr, munarasynyń bıiktigi 18 metr, kúmbezi 12, al qabyrǵasy 5 metr. Qulshylyq úıiniń qurylys jumystary osy jyldyń qyrkúıek aıynda aıaqtalady dedi, jobaǵa jaýapty mamandar. Óńir basshysy aýdan ákimi Tilek Kóshmaǵanbetovke meshittiń ınfraqurylymyn baqylaýǵa alý jumystaryn tapsyrdy.
Budan keıin, oblys ákimi Ondy aýylynyń turǵyndarymen kezdesti. Kezdesý barysynda aýyl ákimi B.Balapan eldi mekenniń áleýmettik-ekonomıkalyq damý kórsetkishteri týraly baıandady.
- Okrýgte búginde 242 otbasy turady. Turǵyndardyń negizi qyzmet túri mal sharýashylyǵy. Aýylda barlyǵy 32 sharýa qojalyǵy jumys jasap tur. «Atameken» memlekettik baǵdarlamasy jáne «Aýyl sharýashylyǵyn qarjylaı qoldaý» qory arqyly birneshe turǵyn nesıe alyp, qazirgi tańda óz kásipterin dóńgeletip otyr jáne 5 aýyl turǵyny «Bıznes bastaý» kýrsyn oqýda, - dedi ol.
2018 jyldy qorytyndylaı kele aýyl basshysy birqatar ıgi ısterdiń atqarylǵandyǵyn, onyń ishinde Basqudyq-Beki aýyz sýynyń ekinshi kezeńi aıaqtalyp, Beki eldi mekenine kóshe jaryǵy tartylǵandyǵyn atap ótti.
Mańǵystaý aýdany ákimi T.Kóshmaǵanbetov turǵyndardyń ál-aýqatyn jaqsartý maqsatynda arnaıy is-qımyl jospary jasaqtalyp, aýdan men aýyldardaǵy qordalanyp qalǵan ózekti máselelerdi ýaqytyly sheshý úshin osy josparǵa saı birqatar jumystar atqarylyp jatqanyn málimdedi.
Aýdan ortalyǵynda 3 aýysymdyq oqytýdyń aldyn alyp, ótken jyly jańa 600 oryndyq mektep paıdalanýǵa berilgen.
«Aýyl el besigi» baǵdarlamasy aıasynda osy jyly aýdanda eki mektep, mádenıet úıi men aýyl klýby kúrdeli jóndeýden ótedi dep josparlanýda.
Jaqynda bastaý alǵan «Bıznes 3 kúnde» jobasyna qajetti materıaldar alynyp, aýdanda daıyndyq jumystary bastalyp ketkendigin atap ketti.
Jıyn sońynda Eraly Luqpanuly aýdan ákimi men oblystyń basqarma basshylaryna Ábish Kekilbaevtyń 80 jyldyq mereı toıyna arnap jasaqtalǵan respýblıkalyq is-sharanyń joǵary deńgeıde ótýine tıisti birqatar jumystardy atqarýǵa tapsyrdy.
