Atyraý oblysynda óńirlik «İsker ana» jobasyn júzege asyrý jalǵasýda. Kópbalaly, jalǵyzbasty jáne erekshe qajettiligi bar balalardy tárbıelep otyrǵan analarǵa, az qamtylǵan otbasylar áıelderine arnalǵan qysqa merzimdi jańa mamandyq alý kýrstary úlken suranysqa ıe, - dep xabarlaıdy Qamshy.kz aqparat agenttigi Atyraý oblysynyń Óńirlik komýnıkasıalar qyzmeti.

"Azamattyq ortalyq" júzege asyryp jatqan joba aıasynda búginde oqý kýrstaryna 519 adam ótinish bildirgen. Jobany júzege asyrý barysynda oqý kýrstarynan ótken 100 adam jańa mamandyqqa ıe bolyp, sertıfıkat aldy. 108 áıel oqýlaryn jalǵastyrýda.

Kýrstarǵa qatysýshylarǵa 10 mamandyq túri tańdaýǵa berilgen: tiginshi, aspaz, sýlylyq salonynyń sheberi( manıkúr, bet árleýshi), shashtaraz, esepshi, massajıst, aǵylshyn tili kýrsy, óndiristik is, satýshy. Jobanyń maqsaty — mamandyǵy men jumysy joq áıelderdiń ózin ózi qamtamasyz etýine qol jetkizý.

Kýrstar aıaqtalǵan soń eń úzdik bitirýshiler jeke bıznes ashý úshin jabdyqtar ala alady. Ol úshin npoatyrau.kz saıtyna kirip, ótinimdi tapsyrý qajet. Búgingi kúni 46 adam osyndaı jabdyqtarǵa ıe boldy (makıaj jıyntyqtary, tigin mashınalary, massajdyq kıimder, shashtaraz qurylǵylary jáne t.b.).

Sonymen qatar, qatysýshylar psıhologıalyq trenıńten ótedi, óz bıznesiniń bolashaǵyn nasıhattaýdy úırenedi, áleýmettik jelilerde ózara árekettesýdiń negizderimen tanysady.

«Bul analarǵa jańa mamandyqtar berýmen qatar, olarǵa otbasynyń jáne jas urpaqtyń bolashaǵyna degen senim syılaıdy» - deıdi jobanyń qatysýshylary.

Aıta keteıik, bul joba Atyraý oblysynyń ákimi Nurlan Noǵaevtyń halyqqa esep berý kezdesýindegi tapsyrmasynan bastaý aldy.

Usynǵan: Ásel Bolatqyzy