Jeńis kúninde úsh myńǵa jýyq atyraýlyq Uly Otan soǵysynda qaza tapqandardy eske alyp, Máńgilik alaý monýmentine gúl shoqtaryn qoıý rásimine qatysty.
- Barshańyzdy osy uly kúnmen - Jeńis kúnimen quttyqtaımyn. Batyrlardyń soǵystaǵy erligi adamzat jadynda máńgi saqtalady. Mıllıondaǵan adamdar maıdan dalasynda bastaryn qaterge tikti, bizdiń beıbit bolashaǵymyz úshin qaza tapty,-dedi Atyraý oblysynyń ákimi Nurlan Noǵaev.
-Jeńisti jaqyndatýǵa Atyraý oblysynyń turǵyndary da úles qosty. Bizdiń óńirden 73 myńnan astam adam maıdanǵa attanyp, 25 myńy qaıta oralmady. Biz olardyń erlikterine bas ıemiz.
Aımaq basshysy Qazaqstanda soǵys órti sharpymaǵan bir de bir otbasy joq ekenin atap ótti. Myńdaǵan sarbazdar soǵysqa attandy, myńdaǵan jerlesterimiz tylda eńbek etip, áskerdi oq-dárimen, azyq-túlikpen, kıimmen, basqa da qajettiliktermen qamtamasyz etti. Jerimizdi qorǵaýǵa búkil halyq úles qosty, beıbit ómir úshin kúresti.
-Sizderdiń aldaryńyzda máńgi qaryzdarmyz. Soǵys jáne eńbek ardagerleri, tyl eńbekkerleri, qaza tapqan erjúrek batyrlarymyzdy, búginde ortamyzda bar barshańyzdy máńgi este saqtaımyz. Óskeleń urpaqty áskerı-patrıottyq turǵyda tárbıeleýde sizderdiń ómir joldaryńyz úlgi. Erlikterińiz ben eńbekterińizge myń taǵzym,-dep atap ótti Nurlan Noǵaev.
Máńgilik alaýǵa gúl shoqtaryn qoıýǵa 3000-ǵa jýyq atyraýlyq qatysty.
Jınalǵandar ardagerlerdi quttyqtap, alǵystaryn aıtty. Jeńis saıabaǵynda joryq as úıi jasalyp, sarbaz botqasy berildi. Áskerı-teatrlandyrylǵan qoıylym uıymdastyryldy, soǵys jyldaryndaǵy ánder shyrqaldy.
