Medısınalyq saqtandyrý qory sarapshylary «MańǵystaýMunaıGaz» AQ basqarmasy qyzmetkerlerimen kezdesti. Onda 2020 jyldyń 1 qańtarynan bastap enetin Mindetti áleýmettik medısınalyq saqtandyrý  (MÁMS) júıesi týraly keń talqylandy.

         «Densaýlyq salasyndaǵy qyzmet kórsetýdiń sapasy men qoljetimdiligin arttyrý – MÁMS júıesiniń basty maqsaty» - dep atap ótti MÁMS qory Mańǵystaý fılıalynyń dırektory Baqyt Torǵaıbaıuly Ismahanbetov.

-Búgingi tańda qarapaıym halyqtyń qymbat medısınalyq qyzmetterge qaltasy kótere bermeıdi. Dári-dármekterdiń de quny arzan emes. Osy maqsatta memleketimiz egjeı-tegjeıli saraptap, aýqymdy zertteý júrgizý nátıjesindemedısınalyq saqtandyrý júıesin engizýdi josparlap otyr. Bul jańalyq halyqtyń áleýmettik turmysyn jaqsartýǵa septigin tıgizedi. Saqtandyrylǵan azamattar magnıtti-rezonansty tomografıa (MRT), KT sıaqty qymbet zertteýlerden tegin óte alady, sondaı-aq búırek, baýyr, júrMek aýystyrý sıaqty kúrdeli otalardy aqysyz jasatatyn bolady, - dedi ol.

         Baqyt Torǵaıbaıulynyń aıtýynsha, mindetti áleýmettik medısınalyq saqtandyrý paketine kirmeıtin medısınalyq qyzmetterdiń jekelegen túrleri erikti medısınalyq saqtandyrý (budan ári – EMS) arqyly tólenýi múmkin, mysaly: eresekterge arnalǵan stomatologıa, zıandy óndiristerde jumys isteıtin qyzmetkerler úshin mindetti merzimdik tekserýler, sanatorıalyq-kýrorttyq emdeý jáne t.b. Barlyǵy kásiporynnyń qalaýy men qarjylyq múmkindikterine baılanysty. Jeke tulǵa nemese kásiporyn (Ujymdyq shart negizinde) MÁMS paketinde qyzmetterdi qaıtalamaıtyn EMS qyzmetter paketin tańdaı alady.

         Bul jerde eskerte ketetin jaıt, ólkemizde iri kásiporyndar bolmasa, óz jumysshylaryna EMS paketin usynýǵa barlyq birdeı mekemeniń múmkindigi jete bermeıdi.

         2019 jyldyń 1 qańtarynan bastap Qazaqstanda ózin-ózi jumyspen qamtyǵan azamattarǵa salyq tóleý rejıminiń jańa túri Biryńǵaı jıyntyq tólem (BJT) engizildi. BJT aılyq tólem kólemi: 1 AEK – respýblıkalyq, oblystyq mańyzy bar qala turǵyndary úshin (2 525 tenge); 0,5 AEK – aýyl turǵyndary úshin (1 263 tenge). Biryńǵaı jıyntyq tólemniń 40%-y medısınalyq saqtandyrý qoryna aýdarylady. 

         Munaıshylar  jeke emhanalarda tegin qaralý qanshalyqty qoljetimdi ekendigin surady. Mańǵystaý turǵyndary Medısınalyq saqtandyrý qorynyń jergilikti fılıalymen kelisimshart jasasqan jeke emhanalarda tegin em qabyldaı alady.