Almatyda 6 jasar qyzdyń ólimine qatysty qylmystyq is tergelip jatyr dep habarlaıdy Qamshy.kz aqparat agenttigi tengrinews.kz saıtyna silteme jasap.

Elızaveta Pylaeva esimdi búldirshin 12-mamyrda kóz jumǵan. Qyzdyń ata-anasy 5 jyl buryn ajyrasqan eken. Qyzdyń ákesi Aleksandr Pylaevtyń aıtýynsha, qyzy 9-mamyrdan bastap anasynyń qaraýynda bolǵan. Al 12-mamyr kúni qyzynyń aýrýhanada jatqany týraly habar alǵan.

"Qyzymdy 12-qalalyq aýrýhananyń jan saqtaý bólimine aparypty. Onyń ólimine omyrqasynyń synýy sebep bolǵan. Dárigerler qyzymnyń aýrýhanaǵa kelmeı turyp-aq jan tapsyrǵanyn aıtty. Onda ne úshin jan saqtaý bólimine jatqyzyp, dári ekkenderin suraǵanymda, meıirbıke "suraǵan soń, jasadyq" dep jaýap berdi. Lızany aýrýhanaǵa bıologıalyq ólim qalpynda alyp kelgenin dárigerler de moıyndap otyr. Lızany aýrýhanaǵa quddy bir jýyndyryp ákelgen sıaqty, denesinde de, kıiminde de qan izderi joq. Biraq denesinde jaraqat bar. Maǵan ony kólik qaǵyp ketti dedi. Biraq, men senbeımin. Meniń oıymsha, bireý jazataıym jaǵdaı etip kórsetip, shyn máninde Lızanyń qalaı ólgenin jasyryp qalmaqshy",-dedi qaza bolǵan qyzdyń ákesi. Onyń aıtýynsha, aýrýhanada qyzdyń janynda burynǵy jary men enesi bolǵan.

Almaty qalalyq polısıa departamentinde bul jaǵdaıǵa baılanysty QR QK 99-baby boıynsha qylmystyq is qozǵaldy. Qyzdyń ólimine qatysty naqty aqparat sot-medısınalyq tekserister aıaqtalǵan soń ǵana beriledi.  

Aýdarǵan: Dáýren Sybanbaı