Eńbek jáne halyqty áleýmettik qorǵaý mınıstri Berdibek Mashbekuly The efır baǵdarlamasyna suhbat berdi dep habarlaıdy Qamshy.kz aqparat agenttigi.
Berdibek Saparbaev suhbattyń basynda óziniń áleýmettik jelige tirkelmegenin aıtty. Sebebi onyń áleýmettik paraqshany júrgizýge ýaqyty joq.
"Eger men áleýmettik jelide jumys isteıtin bolsam qazirgi jumysymnyń jartysyn tastaýym kerek bolady. Shynynda ýaqytym joq. Ózim keshki 21:00-ge deıin jumysta bolyp, úıge túngi 22:00-de kelemin. Keıide túngi 00:00-ge deıin jumys isteımin. Sebebi ózimniń aıaqtalmaı qalǵan jumystarym bolady. Sodan soń men túngi 02:00-ge deıin áleýmettik jelilerde otyratyn bolsam, qaı kezde men demalamyn?!", - dep túsindirdi mınıstr.
Keıin mınıstr óziniń bir kúndik ómiri týral aıtyp berdi.
"Tańerteń áleýmettik jeliler men saıttardy qarap shyǵamyn. Keıin bizge baılanysty synı máselelerdi ózimniń orynbasarlarym men baspasóz hatshylaryma tapsyrma beremin", - deıdi Berdibek Saparbaev.
Sondaı-aq Berdibek Saparbaev mınıstr bolǵannan bastap oryn alǵan ózgerister týraly da sóz qozǵady.
"Ózgeristiń bireýi áserese kóp balaly jáne az qamtylǵan otbasylardy az da bolsa tynyshtandyrdyq. Ózińiz qaraıtyn bolsańyz, qazir áleýmettik jelilerde osydan 2 aı burynǵy máseleler men qazirgi máselelerdi salystyrýǵa kelmeıdi. Iaǵnı, kúrdeli máseleler tolyqtaı deýge bolmas, biraq azaıdy. Kóbisi úshin jańa ataýly áleýmettik kómekti alý mańyzdy boldy. Kópshilik ataýly áleýmettik kómekti ýaqytyly bermeıdi, Úkimet tapsyrmany oryndamaıdy dep oılady. Biz merziminde oryndadyq. 1 sáýirden bastap jańa ataýly áleýmettik kómekti bere bastadyq. 15 mamyrǵa deıin 178 myń otbasyǵa 30 mlrd teńge ataýly áleýmettik kómek berildi. Árıne bastapqy kezde qıynshylyqtar men kemshilikter boldy. Sondaı-aq Elbasy men memleket basshynyń tapsyrmasymen barlyq óńirlerdi aralap shyqtyq. Sol kezde biz egjeı-tegjeıli túsindirgen bolatynbyz. Otbasylarǵa baryp, olardyń turmystyq jaǵdaılaryn kórdik", - deıdi Berdibek Saparbaev.
"Járdemaqyny biz otbasynyń aılyq tabysyna qaraı jarty nemese bir jylǵa esepteımiz. Eger jarty jyldyń ishinde otbasynyń tabysy ózgeretin, ıaǵnı kóbeıetin bolsa biz járdemaqyny toqtatyn bolamyz. Al zeınetaqyǵa keletin bolsaq, biz árdaıym aıtyp júrmiz. Zeınetaqy zeınetker úshin beriledi. Bul solardyń óz shyǵyndaryn jabý úshin birledi. Qazirgi tańda zeınetaqynyń ortasha mólsheri 60 myń teńgeden asady. Eń kóbi 100 myń teńge. Iaǵnı bul zeınetkerdiń ózine jetkilikti deýge bolady. Basqa memlekettermen salystyrǵanda bizdiń zeınetaqynyń ortasha mólsheri jaman emes. Biraq sáýirden bastap az qamtylǵan otbasylarǵa, altyn, kúmis alqa alǵan analarǵa, múgedekterge beriletin járdemaqy men shákirtaqy tabys kózi retinde eseptelindi. Alaıda biz muny alyp tastadyq. Tek jeke qosalqy sharýashylyqty esepteý kezinde úlken ózgeris enetin bolady. Áleýmettik jelilerde "bizdiń taýyǵymyzdy, jumyrtqamyzdy esepteıdi. Úıge kelip tońazytqyshymyzdaǵy tamaǵymyzdy qaraıdy", - dep aıtqandar boldy. Munyń bári durys emes. Eshkimniń tońazytqyshyńyzdy nemese úıińizdi tekserýge haqy joq! Maldy eseptegen kezde de muqıat bolýy kerek. Mysaly bir úıdegi sıyrdan naqty paıda bar ma, joq pa? Sıyrdan sút shyqpaıtyn bolsa odan paıda joq. Sosyn bir úıde jalǵyz sıyr bolsa, ony baryp olar soıyp tastamaıtyny anyq. Budan da paıda joq. Iaǵnı shyǵyny da, paıdasy da eseptelý kerek", - deıdi Berdibek Saparbaev.
Mınıstr suhbat barysynda óziniń ótken kúnderin de eske aldy.
"Kóptegen jastar aýylǵa baryp, jumys istegisi kelmeıdi. Jalaqysy az deıdi. Azdan bastaý kerek. Eger sen jaqsy jumys istep búgin 50 myń teńge alsań, erteń 60 myń teńge alatyn bolasyń. Endi bárimiz de jas boldyq, bárimiz de solaı bastadyq qoı. Eshkim birden bastyq bolyp 200-300 myń teńge alǵan joq. Barlyǵy birden kelmeıdi ǵoı. Men de "grýzchık" boldym. Óıtkeni maǵan januıamdy asyraý kerek boldy", - dedi mınıstr.
Daıyndaǵan: Ásel Bolatqyzy
