Latvıanyń Lıepaı qalasynyń týmasy Roman Lúbımov Máskeýde quldyqqa jegilgen adamdardy qalaı qutqarǵany týraly aıtyp berdi dep jazady Qamshy.kz aqparat agenttigi delfi.lv saıtynyń deregin negizge alyp. Quldyqta bolǵandardyń qatarynda qazaqstandyqtar, qyrǵyzstandyqtar men ózbekstandyqtar da bolǵan. 

Roman "Álternatıv" atty uıym belsendilerine 2012 jyly kómek kórsetken. Máskeýdegi atyshýly dúkende quldyqqa jegilgen Ortalyq Azıa turǵyndaryn qalaı qutqarǵanyn eske aldy. 

Reseılikterdiń quldary bolǵan azamattar jerde uıyqtaǵan, tipti olardyń keıbiri 12 jyl boıy azap shekken. Romannyń sózinshe, olardy kez kelgen sebeppen aıaýsyz soqqyǵa jyqqan. Sondaı-aq dúkende beınekamera bolǵandyqtan, olardyń ár basqan qadamdary baqylaýda boldy. 

"Bir áıeldiń saýsaǵynyń saý tamtyǵy qalmady. Barlyǵy synǵan. Eń soraqysy, dúken ıesinen 2 balasy boldy. Onyń eshqandaı tańdaýy bolmady. Birneshe jyldyń ishinde ol álgi dúkennen 2 ret bosanar kezinde ǵana syrtqa shyqqan. Bir balasyn ,Qazaqstanǵa jiberemiz, dep alyp ketken. Biraq onyń aǵzasyn satýǵa alyp ketkeni anyqtaldy. Uıym osyǵan uqsas 4 jaǵdaı bolǵanyn rastap otyr. Álgi áıeldiń ekinshi balasynan belgisiz bir suıyqtyq alǵan. Ol kezde bala tym kishkentaı boldy. Biraq sol jaıttan keıin bala damymaı qalǵan. 6 jasynda 3 jastaǵy bala sekildi bolǵan. Ol anasymen birge jertólede turypty", - deıdi Roman. 

Romannyń aıtýy boıynsha, polısıa qyzmetkerleri atalmysh jaıtqa baılanysty eshqandaı shara qoldanbaǵan. Aryzdaný úshin qashyp kelgen azamattardy qaıtadan  dúken ıelerine aparypty. Keıin olar qashyp ketkeni úshin taıaq jegen. 

Sońynda "Alternatıv" uıymy quldyqta bolǵandarǵa aqsha jınap, qujattaryn rettep bergen. Sodan keıin ǵana olardy quldyqtan qutqarǵan. 

Aýdarǵan: Ásel Bolatqyzy